Ruajtja e shëndetit të kockave dhe gingivave

Ndër udhëzimet e nxjerra nga projekti “Healthy Bone, Healthy Gums” (“Kockë e shëndetshme, mishra të shëndetshëm”), në bashkëpunim me Shoqatën Italiane të Ortopedisë dhe...

Ndër udhëzimet e nxjerra nga projekti "Healthy Bone, Healthy Gums" ("Kockë e shëndetshme, mishra të shëndetshëm"), në bashkëpunim me Shoqatën Italiane të Ortopedisë dhe Traumatologjisë (SIOT), është edhe rëndësia e një stili aktiv jetese, duke ushtruar rregullisht aktivitet fizik dhe ajo e të ushqyerit shëndetshëm dhe në mënyrë të ekuilibruar, duke respektuar sasitë ditore të marrjes së kalciumit dhe nivelet e duhura të vitaminës D në trup (të arritshme nëpërmjet ekspozimit në diell, apo nëpërmjet suplementimit).

Ekspertët theksojnë rëndësinë e reduktimit të përdorimit të tepërt të kripës (e cila shton eliminimin e kalciumit nëpërmjet urinës) dhe të shmangies së tymosjes dhe konsumit të alkoolit, të cilat ulin përthithjen e kalciumit dhe reduktojnë aktivitetin e qelizave që kontribuojnë në formimin e kockës.

Sigurisht, rekomandimeve u shtohet larja e dhëmbëve dy herë në ditë dhe pastrimi i mëtejshëm me fill dentar, si edhe vizitat e vazhdueshme stomatologjike dhe periodontale në intervale të përcaktuara nga stomatologu, sidomos nëse pacientët kanë gingiva të gjakosura, aromë të keqe të gojës, apo dhëmbë që lëvizin. Ju nuk duhet vetëm të lani dhëmbët tuaj natyralë, por duhet edhe të kujdeseni për protezat (nëse keni), të cilat nëse janë të lëvizshme, duhet "të puthiten gjithmonë mirë". Nëse kjo nuk ndodh, ju duhet t'i drejtoheni dentistit për t'i rishikuar ato.

Një tjetër aspekt i rëndësishëm, për të cilin u tërhiqet vëmendja pacientëve është kujdesi që duhet të tregojnë në përdorimin e barnave, sidomos të atyre për trajtimin e osteoporozës.

"Barnat antiresorbuese, të tilla si bifosfonatet, denosumabi dhe romosozumabi, lidhen me zhvillimin e osteonekrozës së nofullës, e cila është një sëmundje e rrallë, me raste e rëndë tek individët që trajtohen për osteoporozë. Kontrolli i shëndetit oral dhe i inflamacionit gingivar ndikon në reduktimin e rrezikut për t'u prekur nga kjo sëmundje", shprehen ekspertët.