A kanë lidhje gingivat dhe zorrët me njëra-tjetrën?

Lidhja ndërmjet mikrobiomës orale dhe asaj intestinale është kthyer në objekt studimi. Mikrobioma orale është më e ndërlikuara e trupit, pas asaj të kolonit dhe ka evidenca të lidhjes ndërmjet periodontitit dhe...

Lidhja ndërmjet mikrobiomës orale dhe asaj intestinale është kthyer në objekt studimi. Mikrobioma orale është më e ndërlikuara e trupit, pas asaj të kolonit dhe ka evidenca të lidhjes ndërmjet periodontitit dhe sëmundjeve inflamatore intestinale. Megjithatë, debati kryesor nuk qëndron te shkaqet, por te lidhjet ndërmjet përgjigjeve përkatëse imunoinflamatore dhe mikrobiomave të lidhura me to, që përkeqësojnë sëmundjen e qëndrueshme.

Sëmundjet jo të transmetueshme (NCD) janë shkaku kryesor i paaftësisë dhe i vdekshmërisë në botë, përgjegjëse për 71% (40 milionë) të vdekjeve, nga të cilat 16 milionë janë të parakohshme. Periodontiti është një sëmundje jo e transmetueshme e kudondodhur dhe e përhapur gjerësisht, e cila është studiuar për lidhjen e saj me të paktën 57 sëmundje jo të transmetueshme sistemike, të tilla si: sëmundja inflamatore intestinale (IBD), kanceri kolonorektal (CRC), diabeti i tipit 2, artiriti reumatoid, sëmundja renale kronike dhe ateroskleroza.

Prevalenca e periodontitit të rëndë është rritur me 8.44% në 30 vitet e fundit dhe tashmë prek 18.9% të popullsisë së rritur në botë (të dhënat e OBSH 2022).

IBD, kryesisht koliti ulçeroz dhe sëmundja Crohn, prek 1.3 milionë vetë në Evropë dhe afro 0.3% të popullsive të Amerikës së Veriut dhe Australisë. Koliti ulçeroz u raportua për herë të parë në vitin 1875 dhe ajo që më pas u njoh si sëmundja Crohn, në vitin 1932. Simptomat orale të lidhura me të u raportuan për herë të parë në vitin 1957 në trajtën e ulcerës afroze dhe në vitin 1969 në trajtën e inflamacionit granulomatoz të gingivave dhe mukozës orale.

"Pseudo-xhepat" u identifikuan në vitin 1972 dhe u rishfaqën në rritjen inflamatore gingivare të lidhur me IBD-në.

Shfaqja e patogjenëve specifikë që fillojnë të mbizotërojnë në një kamare ekologjike quhet "disbiozë" dhe marrëdhënia midis disbiozës dhe inflamacionit është komplekse. Sidoqoftë, disbioza periodontale shoqërohet me sëmundje të shumta inflamatore jo të transmetueshme (NCD), duke përfshirë sëmundjet inflamatore intestinale (IBD), kryesisht kolitin ulceroz dhe sëmundjen Crohn.

Për më tepër, periodontiti dhe IBD janë raportuar se ndikojnë reciprokisht në përparimin e tyre përmes një marrëdhënieje të dyanshme, në të cilën, si inflamacioni oral, ashtu edhe disbioza e mikrobiotës orale ndikojnë në mikrobiotën e zorrëve, duke nxitur ndryshime inflamatore dhe anasjelltas.

Mikrobiota orale dhe intestinale përbëjnë mikrohabitate të dallueshme me mikroflora specifike. Megjithatë, studimet gjenomike të kryera në mbarë botën kanë demonstruar një pasurim të specieve orale brenda traktit gastrointestinal të pacientëve me IBD, duke përdorur biopsi të zorrëve dhe mostra të feçes.

Megjithatë, studimet e baktereve orale në brendësi të traktit gastrointestinal të njeriut mbeten ende të kufizuara.