Odontopaste. Efekti i saj antimikrobik në trajtimet kanalare

Suksesi i procedurave endodontike në infeksionet bazë të kanalit të rrënjës qëndron kryesisht në reduktimin e ngarkesës bakteriale, e cila ndikohet nga lloji i agjentëve patogjenë të pranishëm dhe nga...

Suksesi i procedurave endodontike në infeksionet bazë të kanalit të rrënjës qëndron kryesisht në reduktimin e ngarkesës bakteriale, e cila ndikohet nga lloji i agjentëve patogjenë të pranishëm dhe nga kohëzgjatja e infeksionit.

Nga ana tjetër, në infeksionet persistente, efikasiteti i procedurave kanalare mund të ndikohet nga zhvillimi i rezistencave mikrobike dhe nga rikontaminimi prej biofilmit. Në këtë rast, trajtimet ndërkanalare mund të jenë të dobishme për reduktimin bakterial maksimal.

Aktualisht, hidroksidi i kalciumit është trajtimi ndërkanalar më i përdorur. Megjithatë, në treg ka përbërje të ndryshme me veçori antiinflamatore, apo me përbërje antibiotike. Nga këto barna, mund të veçojmë Odontopaste, një trajtim ndërkanalar me bazë oksidi zinku, i përbërë nga 5% hidroklorid klindamicine, 1% acetonid triamcinoloni dhe 0.5% hidroksid kalciumi.

Qëllimi kryesor i Odontopaste është reduktimi i inflamacionit dhe i dhimbjes postoperatore, duke parandaluar rritjen bakteriale në sistemin kanalar. Ky trajtim ka dhe efekte të dukshme analgjezike, pa shkaktuar diskromi dentare, siç mund të ndodhë me pastat e tjera ndërkanalare.

Efikasiteti i vërtetë i këtij bari është demonstruar në shumë pak studime literature deri më tani.

Në një analizë sistematike u përfshinë katër studime in vitro. Një studim demonstroi se Odontopaste shfaqte një rritje qelizore mikrobike, dukshëm më të madhe në thellësi të rrënjës, krahasuar me barna, ose substanca të tjera të testuara.
Nga një studim tjetër u zbulua se Odontopaste i kishte reduktuar dukshëm njësitë formuese të kolonive, krahasuar me propolisin dhe kloreksidinën. Rezultate të mëtejshme treguan se Odontopaste nuk e redukton mjaftueshëm kontaminimin mikrobik nëse përdoret e vetme.

Më tej, kombinimi i saj me hidroksid kalciumi nuk shfaqi shtim të efikasitetit të hidroksidit të kalciumit. Studimet e përfshira këtu janë analizuar në një nivel mesatar-të lartë rreziku për bias.

Nga të dhënat e kësaj analize, mund të përfundohet se nuk ka evidenca të mjaftueshme cilësore në literaturë për të arritur efikasitet më të mirë antimikrobik të Odontopaste, krahasuar me trajtime të tjera ndërkanalare. Prandaj, nevojiten studime të mëtejshme për përcaktimin e efikasitetit të Odontopaste si trajtim antimikrobik në endodonci.