Dhimbja akute me origjinë endodontike. FANS-at e duhura

Dhimbja që lidhet me infeksionet e pulpës dentare dhe ato të indeve periapikale mund të jetë aq e fortë sa shpesh pacientët kanë nevojë për trajtime stomatologjike urgjente. Mund të...

Dhimbja që lidhet me infeksionet e pulpës dentare dhe ato të indeve periapikale mund të jetë aq e fortë sa shpesh pacientët kanë nevojë për trajtime stomatologjike urgjente.

Mund të ndodhë që dhimbja të fillojë pas nisjes së trajtimit kanalar, ngjarje e cila verifikohet në 3-58% të rasteve, në varësi të individit dhe faktorëve të tjerë. Dhimbja postoperatore lidhet zakonisht me lezionet mekanike, kimike ose mikrobiologjike në indet periradikulare. Urgjenca mund të jetë një situatë stresuese, si për pacientin, ashtu edhe për dentistin, për aq kohë sa është një ngjarje e papritur.

Trajtimi i urgjencave endodontike duhet të ndjekë parimet e 3D- Diagnosis, Definitive dental treatment and Drugs (3D-të - Diagnoza, Trajtimi dentar përfundimtar dhe Barnat)

Diagnostikimi i saktë ("D-ja" e parë) është thelbësor për përcaktimin e trajtimit të duhur. Për diagnostikimin nevojitet njohje e thelluar e një sërë sëmundjesh që mund të shkaktojnë urgjencë.
Diagnoza duhet ta orientojë mjekun drejt trajtimit dentar përfundimtar të duhur ("D-ja" e dytë). Trajtimi kanalar nuk është gjithmonë i nevojshëm, pasi disa raste mund të trajtohen në mënyrë konservative, ndërsa disa të tjera kërkojnë një trajtim të ri kanalar.

"D-ja" e fundit nënkupton "drugs" (barnat). Përdorimi i barnave duhet të varet edhe nga diagnoza e trajtimi dentar. Barnat duhet të jenë vetëm plotësuese pas trajtimit dhe është thelbësore që mjeku ta dallojë inflamacionin nga infeksioni, në mënyrë që të përcaktojë trajtimin e duhur dhe të përshkruajë barin e përshtatshëm për një lehtësim efikas të dhimbjes dhe për zhdukjen e simptomave dhe shenjave të tjera, të tilla si ënjtja. Barnat antiinflamatore josteroide (FANS) janë më të përdorurat në parandalimin dhe kontrollimin e dhimbjes endodontike akute dhe postoperatore, nga të cilat ibuprofeni është më i studiuari.

Këto barna, së bashku me paracetamolin, konsiderohen shumë të rëndësishme në trajtimin e dhimbjes me origjinë endodontike, pikërisht për shkak të aftësisë së tyre në uljen e inflamacionit, pasi frenojnë sintezën e prostaglandnave në vendet e inflamuara.

Pra, FANS duhet të jenë zgjedhja e parë e stomatologëve për lehtësimin dhe reduktimin e dhimbjes me origjinë endodontike, për aq kohë sa marrja e tyre nuk shkakton efekte anësore te pacienti.

Në rastet kur një FANS nuk është efikas, rekomandohet që të kombinohet me paracetamol, apo me një bar me veprim qendror. Nga ana tjetër, barnat steroide janë shfaqur efektive në rastet e pulpitit irreversibël.