Presidentja e Shoqatës së Stomatologëve: Kaviteti te fëmijët, në shifra të larta.

Jemi në javën e shëndetit oral dhe Shqipëria renditet më keq se vendet e rajonit, me 1 në 4 fëmijë që ka probleme me dhëmbët. Kjo ndodh për shkak të...

Jemi në javën e shëndetit oral dhe Shqipëria renditet më keq se vendet e rajonit, me 1 në 4 fëmijë që ka probleme me dhëmbët. Kjo ndodh për shkak të kujdesit të ulët ndaj shëndetit oral, pasi të vegjël dhe të rritur kujtohen të shkojnë te dentisti vetëm kur kanë dhimbje dhe nuk bëjnë kontrolle rutinë.

"84% e fëmijëve 5-vjeçarë kanë nevojë për ndërhyrje dentare", shprehet presidentja e Shoqatës së Stomatologëve në Shqipëri, Etleva Dobroniku.

"Janë dy studime në rang kombëtar në grupmoshën 5-vjeçare dhe 12-vjeçare, rezultatet e të cilave kanë dalë jo të mira dhe larg atyre që kanë vende të tjera të Bashkimit Evropian. Eksperienca karioze në grupmoshën pesëvjeçare është 4.4 dhe nevoja për trajtim dentar, 84%. Është një shifër shumë e lartë. Rreth 12 mijë fëmijë morën pjesë në studim, ndërkohë që te mosha 12-vjeçare eksperienca karioze prek shifrat 3.6%. Ne nuk mund te krahasohemi me Danimarkën që është 0.6% apo Francën me 1.2, por të paktën mund të krahasoheshim me vendet e rajonit, ama jemi edhe mbrapa tyre", thekson presidentja e Shoqatës.

"Kujdesi për dhëmbët duhet fillojë që në shtatzëni e të vazhdojë edhe pasi lind foshnja. Kontrolli i parë te dentisti duhet bërë 6 muaj pas dhëmbit të parë. Një infeksion në dhëmb mund të shkaktojë edhe patologji të tjera. Infeksionet bakteriale kanë florë të pasur bakteriologjike, e cila shpërndahet në gjak dhe më pas në sistemin kardiak, atë respirator dhe gastrointestinal", thotë znj. Dobroniku.

Mjekët stomatologë rekomandojnë që dhëmbët duhen larë pas çdo vakti, apo minimumi dy herë në ditë, ndërsa furça e dhëmbëve duhet ndërruar çdo tre muaj. Po ashtu, stomatologët theksojnë se duhet bërë kujdes më pastën që përdoret. Për të gjitha këto kërkohet të shpërndahet sa më shumë informacion, si në sistemin parashkollor, ashtu edhe nëpër shkolla.

Alma Demiraj