Shtohen frakturat dentare pas pandemisë së Covid-19

Infektimet me Covid-19 u kthyen në pandemi pasi ky virus shpërtheu në Kinë në fund të vitit 2019 dhe më pas u përhap me shpejtësi të gjithë botën. Shumë vende...

Infektimet me Covid-19 u kthyen në pandemi pasi ky virus shpërtheu në Kinë në fund të vitit 2019 dhe më pas u përhap me shpejtësi të gjithë botën. Shumë vende të botës morën masa drastike me qëllim frenimin e përhapjes së virusit.

Shumë studime të literaturës kanë demonstruar se si e ka përkeqësuar pandemia shëndetin mendor të shumë individëve, duke u shkaktuar stres, ankth dhe çrregullime afatshkurtra, apo afatgjata të gjumit.

Tipologjia e kërkimit dhe metoda e analizës
Në një studim të publikuar në Journal of Conservative Dentistry and Endodontics, autorët kanë analizuar lidhjen ndërmjet stresit të shkaktuar nga pandemia e Covid-19 dhe parafunksioneve të artikulacionit temporomandibular dhe të muskujve përtypës, të cilët shtojnë, herë pas here, incidencën për fraktura dhe lezione dentare.

Rezultatet
Gjithsej 730 stomatologë plotësuan një sondazh për studimin. Nga këta, 450 (61.7%) deklaruan se numri i pacientëve që kishin referuar dhimbje muskulare apo artikulare në mëngjes, ishte shtuar gjatë pandemisë. Ndërsa, 414 (56.7%) stomatologë kanë vërejtur një shtim të parafunksioneve dhe 392 (53,6%) konstatuan një shtim të frakturave dentare gjatë asaj periudhe.

Përfundimet
Autorët e studimit dalin në konkluzionin se ekziston një lidhje e rëndësishme ndërmjet stresit të shkaktuar nga pandemia dhe frakturave dentare.

Ndërlikimet klinike
Pandemia e Covid-19 e ka prekur thellësisht shoqërinë dhe individët, sidomos nga ana psikologjike. Ajo ka shtuar stresin, ankthin dhe frikën, të cilat kanë ndikuar në disa sëmundje orale, duke favorizuar fenomenet parafunksionale e okluzale dhe çrregullimet artikulare.

Shtimi i parafunksionit ka shkaktuar shtim të frakturave dentare, me incidencë më të lartë te dhëmbët që janë trajtuar më parë nga ana endodontike.

Në kuadër të këtyre të dhënave, është e rëndësishme që stomatologu të marrë parasysh gjendjen psikologjike të pacientit dhe ndikimin që situata shoqërore të caktuara, si Covid-19 dhe ato personale mund të kenë mbi shëndetin oral.