Intervistë me Prof.Asoc.Dorjan Hysin mbi Konferencën e 22 Kombëtare Dentare dhe mundësitë e stomatologëve për të ndjekur aktivitete të edukimit në vazhdim

Nga Dorina Gjuzi

Për dy ditë rresht këtë fundjavë do të zhvillohet Konferenca Kombëtare Dentare në vitin e njëzet e dytë të saj në ambientet e Hotel Tiranës. Interesi i stomatologëve për ta ndjekur ka qenë aq i madh sa organizatorët, Shoqata Dentare Shqiptare dhe Fakulteti i Mjekësisë Dentare, janë detyruar t'i mbyllin regjistrimet 10 ditë para zhvillimit të eventit. Lidhur me detajet e organizimit, por edhe vështirësitë që mund të hasin stomatologët në ndjekjen e aktiviteteve të akredituara, flet Prof.Asoc. Dorjan Hysi, kreu SHDSH-së.

Prof. Hysi, këtë vit regjistrimet për konferencën janë mbyllur më herët se vitet e tjera. Keni pasur ankesa nga stomatologët qe kanë dashur te marrin pjesë por s'kanë mundur?

Konferenca e 22 Kombëtare Dentare është aktiviteti kryesor vjetor i stomatologjisë dhe kërkesat nga mjekët stomatologë kanë qenë të shumta. Megjithatë duhet të kuptojmë që kapacitetet e infrastrukturës ku do zhvillohet aktiviteti kanë një limit dhe mbi bazën e këtij limiti miratohet edhe një kuotë nga Qendra Kombëtare e Edukimit në Vazhdim, të cilën ne jemi të detyruar të respektojmë. Kjo është edhe arsyeja pse ne i mbyllëm regjistrimet, pra numri i pjesëmarrësve është plotësuar. Nëse do të kishim një qendër kongresesh dhe konferencash, që këtu te ne mungon, me salla për 500 veta ose më tepër, atëherë nuk do ta kishim më këtë problem.

Megjithatë mendoni se aktivitetet dedikuar stomatologëve në vend janë të pamjaftueshme, prandaj ka edhe dyndje në evente si ky?

Ne si Shoqatë zhvillojmë përgjithësisht dy aktivitete në vit: Konferencën Kombëtare dhe Ditën Botërore të Shëndetit të Gojës, por ka edhe aktivitete të tjera të ndërmjetme si p.sh. ato që zhvillojnë shoqatat e specialiteteve, si Shoqata e Ortodoncisë dhe ajo e Kirurgjisë. Natyrisht që mundësia për të marrë kredite në aktivitete të tjera ekziston, vetëm duhet që mjekët stomatologë të informohen pak më tepër, t'i kushtojnë rëndësi informacionit dhe ta marrin atë në kohën e duhur. Sepse edhe këto shoqata në momentin që plotësojnë kapacitetet e tyre janë të detyruara të mbyllin regjistrimet.
Veç këtyre ka edhe aktivitete, konferenca të akredituara që mund të kryhen jashtë vendit.

Sa të lehtë e kanë të gjejnë informacionet mbi zhvillimin e këtyre konferencave mjekët stomatologë? Ju i pasqyroni në faqen tuaj?

Ne pasqyrojmë ato të Shoqatës Ballkanike, të Shoqatës Dentare Turke, Federatës Dentare Ndërkombëtare, Shoqatës së Kosovës dhe Shoqatës së Shqiptarëve të Maqedonisë me të cilat kemi edhe marrëveshje, por nuk mund të pasqyrojmë të gjitha aktivitetet e shoqatave dentare të Europës.
Nga ana tjetër, kur mjekët stomatologë e kanë të pamundur të marrin pjesë në aktivitete direkte një mundësi janë edhe kurset online. Në bazë të rregullores së QKEV-së, një përqindje e caktuar kreditesh mund të merret edhe nëpërmjet këtyre kurseve. Në këtë drejtim Shoqata Dentare Shqiptare ka një marrëveshje me platformën Educazione Continua in Medicina (ECM33.al), ku kurset online ofrohen nga shtëpia botuese LIFE me një çmim të reduktuar për stomatologët që regjistrohen nëpërmjet SHDSH-së. Pra janë disa opsione: prezenca direkte në konferenca brenda dhe jashtë vendit, seminaret e ndryshme, botimet e referimet dhe kurset online.

4) Kthehemi te konferenca si është organizuar? Pjesë e saj do të jetë edhe një panair dentar, çfarë do te ekspozohen aty?

Konferenca është e ndarë në tre seksione paralele, ku dy prej tyre janë salla lektorësh dhe një është sallë prezantimesh orale. Njëra nga sallat do të jetë vetëm me lektorë të huaj dhe tjetra me lektorë shqiptarë, ndërsa prezantimet orale janë nga kolegët shqiptarë, por mund të ketë nga Maqedonia dhe Kosova. Ekspozita është një event tjetër që i bashkëngjitet konferencës, në të cilën marrin pjesë distributorë dhe kompani shqiptare që përfaqësohen me kompani multinacionale. Mjekët stomatologë do të kenë mundësi që të njihen aty me materiale, produkte të ndryshme dhe teknologji të reja, gjë që sigurisht është pozitive për shkak se mund t'i përdorin në praktikat e ndryshme profesionale dhe në fund të fundit kjo rrit cilësinë e shërbimit.

Në faqen e SHDSH hapësirë e veçantë i është dedikuar edhe lektorëve të huaj e shqiptarë me një prezantim të shkurtër për secilin. Disa prej tyre janë emra të njohur si Prof. Kenneth Eaton, botimin e të cilit e kemi edhe në Shqipëri. Mbi çfarë do të referojë prof. Eaton?

Siç e përmendët në këtë aktivitet marrin pjesë profesorë të cilët janë tepër të njohur në arenën ndërkombëtare, si përsa i përket specialitetit të tyre ashtu edhe publikimeve në rrjetin e botuesve botërorë. Një ndër ta është profesor Eaton, specialist në perodontologji dhe në shëndetin publik dentar dhe profesor nderi në disa universitete europiane. Prof. Eaton do të ketë dy tema në perodontologji, fushë në të cilën ka publikuar dhe një libër bashkë me Prof. Philip Ower, i ftuar në konferencë gjithashtu. Prof. Ower aktualisht është presidenti i Shoqatës Britanike të Perodontologjisë. I pranishëm në konferencë do të jetë edhe Georgios Traskos, aktualisht profesor në Universitetin e Londrës ndërsa dikur ka qenë president i Shoqatës Europiane të Shëndetit Publik Dentar. Prof.Paula Vasallo, drejtuese e platformës për një Shëndet të Mirë të Gojës në Europë, Prof.Corrado Paganelli, president i Shoqatës së Edukimit Dentar në Europë ku janë anëtare pjesa më e madhe e fakulteteve dentare europiane, Prof. Marko Jakovac dhe të tjerë personalitete do të na nderojnë me temat e tyre këtë vit.

Ju vetë çfarë teme do të referoni?

Unë personalisht kam vendosur të mos jem te pjesa klinike për shkak se kemi pasur disa vështirësi te paraqitja e abstrakteve që bëjnë kolegët. Kam menduar që të përgatis një prezantim mbi mënyrën se si duhet të përgatitet një abstrakt për një artikull, për një botim, apo edhe për një referim kur aplikohet për një konferencë ndërkombëtare. Mendova se do të jetë në ndihmë të kërkuesve të rinj të cilët në vitet e ardhshme do të kenë mundësi që t'i përmirësojnë abstraktet duke pasur parasysh elementet që duhet të respektohen dhe që shikohen nga bordi shkencor në konferencë.
Në fund shpresoj që aktiviteti të përmbushë qëllimin për të cilin është organizuar dhe që kolegët do të jenë të pranishëm e marrin pjesë aktive në këtë konferencë duke respektuar rregullat që gjithçka të shkojë ashtu siç duhet.