Prof.ass. Dorjan Hysi: Mendoj që kongresi i përmbushi pritshmëritë. Interesi për leksionet ishte maksimal dhe sallat të tejmbushura

Të shtunën u mbyll Kongresi IV Mbarëshqiptar i Stomatologjisë, i cili shënoi numrin më të madh të pjesëmarrësve me mbi 1000 profesionistë të stomatologjisë nga vendi dhe trevat shqiptare jashtë tij. Megjithëse kërkesat ishin të shumta dhe kapacitetet pritëse të Hotel Tiranës nuk mund të përballonin fluksin regjistrimet u mbyllën para afatit. Nga ana tjetër kreu i SHDSH, prof.ass. Dorjan Hysi, shprehet entuziast për organizimin, lektorët e ftuar dhe interesin e lartë të ndjekësve duke nënvizuar se këtë vit angazhimi ishte maksimal në çdo drejtim dhe aktiviteti rezultoi më cilësor se në të kaluarën.

Dr. Hysi me ç'përshtypje u ndanë stomatologët nga Kongresi treditor i Stomatologjisë?

Nga bashkëbisedimet që kemi pasur me kolegë të ndryshëm, kemi marrë një vlerësim shumë më pozitiv krahasuar edhe me aktivitete të tjera të mëparshme. Duke qenë se ata marrin pjesë në evente me përmasa të njëjta edhe jashtë vendit, janë në gjendje të bëjnë krahasime. Kuptohet që opinioni i tyre na bën të ndihemi mirë sepse jemi angazhuar intensivisht, jemi lodhur dhe kemi sakrifikuar për një nivel sa më cilësor të Kongresit. Tashmë Shoqata Dentare Shqiptare ka ekperiencën dhe burimet njerëzore për të organizuar aktivitete të ketyre përmasave, kombëtare dhe ndërkombëtare. Të njëjtën përshtypje ndanë edhe profesorët e huaj duke përgëzuar organizimin dhe stafin përgjëgjes.

Pra eventi i përmbushi pritshmëritë e tyre...

Po stomatologët e kanë parë në dy aspekte këtë event: për nga organizimi, informimi, ndarja e leksioneve/ prezantimeve, pushimet, e në përgjithësi mënyra e funksionimit ka qenë më e mirë. Dhe aspekti tjetër lidhet me cilësinë e lektorëve. Kanë qenë të ftuar lektorë të cilët janë të njohur në nivel ndërkombëtar. Ishin profesorë nga Italia, Turiqa, SHBA, Greqia etj. që është vërtet nder t'i kesh, profesorë të cilët merren me kërkime shkencore. Në këto dy aspekte besoj se i kemi arritur pritshmëritë.

Cilat ishin disa nga risitë që e dalluan këtë event?

Numri i lartë i leksioneve nga profesorë të huaj në specialitete të ndryshme. Gjithashtu ekspozita ka qenë më e mirë organizuar se vitet e tjera, ndonëse kemi pasur çdo vit ekspozita këtë radhë kishte shumë më tepër kompani pjesëmarrëse. Madje kemi pasur kërkesa nga kompani nga Sllovenia, Kroacia etj., të cilat nuk patëm mundësi t'i përfshinim pasi u informuam jashtë afateve. Na kanë lënë kontaktet e tyre për evente të ardhshme që do të zhvillojmë. Kongresi ka pasur si risi edhe aktivizimin masiv të studentëve të cilët i kanë dhënë freski, energji dhe një ndihmesë të paçmuar mbarëvajtjes së aktivitetit.

Leksionet, prezantimet, ekspozita të gjitha u zhvilluan sipas planit, por nuk pamë work shop-e?

Work shop-et nuk u realizuan për shkak të impenjimeve të disa lektoreve në aktivitete ndërkombëtare, megjithatë Shoqata Dentare Shqiptare ka një axhendë të percaktuar për organizimin e seminareve, leksioneve dhe workshop-eve në vitin që vjen. Për këtë kemi biseduar dhe kontaktuar me shumë aktorë të rëndësishëm edhe jashtë vendit. Shoqata Dentare Shqiptare do të jetë gjithmonë në krah të kolegëve për procesin e edukimit në vazhdim duke u ofruar vazhdimisht aktivitete me cilësi dhe sipas specialitetit.

Cilat ishin disa nga tematikat që ngjallën më shumë interes?

Kishte tematika nga të gjitha specialitetet e stomatologjisë. Pra u prezantuan tema të kirurgjisë orale, ortodoncisë, pedodontisë, endodontisë, implantologjisë e shumë të tjera. Shoqata Dentare Shqiptare kur organizon një event nuk përfshin vetëm një specialitet, dihet që një koleg është i interesuar për kirurgjinë orale, por dikush tjetër që nuk është kirurg maksilo-facial dëshiron të ndjekë p.sh. dentistrinë restaurative.
Nëpër leksione dhe prezantime u fol në mënyrë shkencore, por nga ana tjetër ekspozita nuk ishte thjesht një vend ku njerëzit kalonin kohën dhe merrnin një fletëpalosje. Aty ata patën mundësi të njihen konkretisht me produktet dhe teknologjitë më të reja që kanë dalë, që në fund të fundit ne na interesojnë sepse me to përmirësojmë edhe shërbimin që ofrojmë.

Përgatiti: Dorina Gjuzi