Prof.Dr. Fejzi Keraj: Tarifat studimore në FMD i përgjigjen nevojave përgatitore të studentëve. Kemi vështirësi me realizimin e fondeve

Për Prof.Dr. Fejzi Keraj viti i ri akademik ka nisur me disa ndryshime pozitive për Fakultetin e Mjekësisë Dentare. Kuotat dhe tarifat e studimit nuk kanë ndryshuar, por dekani i këtij fakulteti nënvizon faktin se pikërisht falë uljes së numrit të studentëve dhe investimeve që janë bërë në salla, la

Dorina Gjuzi

Për Prof.Dr. Fejzi Keraj viti i ri akademik ka nisur me disa ndryshime pozitive për Fakultetin e Mjekësisë Dentare. Kuotat dhe tarifat e studimit nuk kanë ndryshuar, por dekani i këtij fakulteti nënvizon faktin se pikërisht falë uljes së numrit të studentëve dhe investimeve që janë bërë në salla, laborator dhe për pajisjet stomatologjike do të rritet cilësia e procesit mësimor në këtë fakultet. Megjithatë, ai apelon për një interesim më të madh të shtetit për investime të tjera të domosdoshme në infrastrukturën e FMD-së, një ndër të cilat është edhe mbyllja e një pike grumbullimi të mbetjeve spitalore ngjitur me fakultetin.

Dr.Keraj me çfarë risish ka nisur ky vit akademik për Fakultetin e Mjekësisë Dentare duke pasur parasysh edhe ndryshimet në ligjin e arsimit të lartë. Dhe ç'objektiva mbeten ende për t'u realizuar?
Nëse flasim për objektiva ne i kemi paraprirë Ligjit të ri të Arsimit të Lartë, i cili kërkon që numrin e studentëve ta caktojnë vetë fakultetet. Kemi dy vjet që e përcaktojmë vetë numrin e studentëve. Në të kaluarën numri që vinte nga Ministria e Shëndetësisë ishte i stërmadh për kushtet e fakultetit, arrinte në 150 - 200 studentë, ndërsa vitin e kaluar ne i reduktuam kuotat në 60 dhe këtë vit janë 62 studentë. Janë 55 nga Shqipëria dhe 7 kuota janë caktuar për studentët e trevave shqiptare përtej kufijve.

A ka ndikuar përgjysmimi i numrit të studentëve në përmirësimin e kushteve mësimore?
Pikërisht ky ka qenë qëllimi, që me numrin e përcaktuar nga ana jonë të mundohemi që të krijojmë kushte pozitive në mbarëvajtjen e leksioneve, praktikave mësimore dhe seminareve. Pra po tentojmë të përgatisim një grup mjekësh të cilët të marrin njohje sa më të mira shkencore dhe profesionale. Kemi marrë kabinete të reja të cilat janë instaluar kryesisht për mjekimin e fëmijëve që janë e ardhmja jonë. Kemi realizuar një sallë leksionesh që është në nivele maksimale sa i takon zhvillimit të leksioneve në fakultet. Pretendojmë që këtë vit të bëjmë investime të tjera në një sallë të dytë, në sekretarinë mësimore, në laboratoret paraklinike dhe shpresoj që gradualisht do të përmirësohen kushtet. Megjithatë nuk mungojnë problematikat. Kështu për shembull shqetësues për ne është autoklavimi i mbetjeve spitalore i cili ndodhet ngjitur me fakultetin tonë. Është bërë kërkesë disa herë që të largohet nga aty dhe ambienti t'i kalojë fakultetit me qëllim që të shtohen sallat studimore.

Si jeni me fondet këtë vit?
Ashtu si për kuotat e pranimit në fakultet, në bazë të Ligjit të ri të Arsimit të Lartë edhe fondet janë mbartur në Fakultetin e Mjekësisë Dentare. Vështirësia krijohet për mënyrën e realizimit të këtyre fondeve që është e lidhur me Universitetin e Mjekësisë. Kemi realizuar disa fonde, por mendoj se për krijimin e kushteve sa më të mira për Fakultetin e Mjekësisë Dentare, duhet edhe një interesim i shtetit në mënyrë që ne të rrisim infrastrukturën e ambienteve, jo duke shtuar tarifat por duke pasur investime ose mundësi nga donatorët.

Tarifa për programin bachelor në FMD këtë vit është 45 mijë lekë, ndërsa për programin e dytë të studimeve 234 mijë lekë. Duke parë edhe tarifat e fakulteteve të tjera, ato të FMD-së janë ndër më të lartat...
Janë ndër më të lartat, por unë mendoj që duhet të jenë edhe më të larta për arsye se këtu ka investim. Studentët nuk marrin vetëm leksione dhe nuk bëjnë vetëm seminare. Që nga parakliniku ne investojmë me materiale të ndryshme, të cilat kanë vlera shumë të mëdha dhe këto tarifa janë gjithmonë për plotësimin e kushteve të studentëve. Që nga viti i parë e deri në vitin e pestë, tarifa e studimit mbetet 45 mijë lekë. Ndërsa tarifa 234 mijë lekë lidhet vetëm me studentët që kanë ardhur nga ajalet e mbyllura. Kjo e fundit është një tarifë e vendosur me vendim qeverie për të gjithë studentët e ardhur nga fakultetet private në fakultetin shtetëror. Duhet të kuptoni që nëse vlera e studimeve të një studenti është përllogaritur në 51 mijë lekë, tarifa është lënë përsëri 45 mijë.

Po për njëjtësimin e tarifave të fakulteteve e hedhur si ide nga disa profesorë...
Ne nuk mund të përafrohemi me fakultete si ai i Gjuhësisë, i Gjuhëve të Huaja ose Fakulteti i Ekonomisë, të cilat mbështeten vetëm në leksionet dhe seminaret. Ne kemi probleme praktike, investojmë me materiale për të realizuar procesin mësimor. Në një moment të caktuar që këto tarifa mund të ulen, ulet edhe niveli i përgatitjes së studentëve. Madje ne kemi akoma mangësi të bazës materiale sepse numri i studentëve të vitit të tretë, të katërt dhe të pestë është shumë i lartë duke na krijuar vështirësi në realizimin e programit mësimor.

A ka politika fakulteti juaj në drejtim të studentëve më të mirë dhe atyre në nevojë me bursa dhe kredi studentore?
Bursat për studentët në nevojë janë të zgjidhura sipas rregullave të sanksionuara nga vendimet e Këshillit të Ministrave ose ministritë dhe ne i kemi marrë parasysh. Në bazë të plotësimit të kushteve, studentët kanë marrë edhe bursat.

Çfarë ndryshimesh duhet të bëjnë universitetet private për të rritur nivelin e stomatologëve të rinj?
Sot për sot nxjerrja e kuadrit stomatolog nga tre fakultetet ekzistues e rrit shumë numrin e mjekëve stomatologë, të cilët kanë vështirësi në tregun e punës. Për mendimin tim do ishte shumë pozitive që siç vendosëm ne uljen e numrit të studentëve ta bënin edhe fakultetet private me qëllim që këta studentët të dalin jo vetëm të përgatitur, por të gjejnë edhe treg pune.

Edhe pak ditë na ndajnë nga Kongresi i 4 Mbarëshqiptar i Stomtaologjisë. Cili është roli i FMD në këtë event?

Njëherë në tre vjet ne organizojmë Kongresin Mbarëshqiptar të Stomatologjisë dhe e quajmë kështu sepse janë të angazhuara në organizim edhe të gjitha stafet e shoqatave dentare, ajo e Shqipërisë, Kosovës dhe Maqedonisë. Kemi ftuar 15 profesorë të huaj nga vende të ndryshme si Italia, Turqia, Franca, etj., që do të mbajnë leksione. Fakulteti i Mjekësisë Dentare është totalisht i interesuar dhe pjesëmarrës edhe me materiale edhe me tema në këtë event të cilit i kemi bashkëngjitur edhe Konferencën 21 Kombëtare Dentare që e organizojmë çdo vit. Kongresi është një mundësi shumë e mirë për kolegët që të takohen me njëri-tjetrin të cilët mund të kenë vite pa u parë, e njëkohësisht janë të interesuar për tematikat që do të trajtohen me kërkesa të larta shkencore dhe profesionale.