Kongresi Mbarëshqiptar i Stomatologjisë, prof.ass. Dorjan Hysi: Shpresoj që stomatologët ta vlerësojnë siç duhet dhe të mos vijnë vetëm për kreditet

35 leksione, 60 prezantime orale dhe 5 salla ku do të punohet paralelisht. Pjesëmarrje aktive jo vetëm me lektorë shqiptarë, por edhe të huaj në eventin më të madh të stomatologjisë në vend që do të mbahet më datat 5,6 dhe 7 nëntor

Dorina Gjuzi

Duhet edhe një muaj që Kongresi i Katërt Mbarëshqiptar i Stomatologjisë të çelë punimet e tij, por në rrethet stomatologjike shqiptare ka filluar të ndihet që tani elektrizimi i një eventi kaq të rëndësishëm. Shoqata Dentare Shqiptare dhe Fakulteti i Mjekësisë Dentare, organizatorët kryesorë të këtij aktiviteti, vijojnë përgatitjet ndonëse pjesa më e madhe e punës është kryer: kanë ftuar lektorët, kanë përzgjedhur prezantimet, prenotuar ambientet dhe kanë publikuar programin e kongresit, i cili për nga pjesëmarrja, larmia e tematikave dhe shtrirja treditore është cilësuar nga kreu i SHDSH, prof.ass. Dorjan Hysi, si evenimenti më i madh i stomatologjisë në vend.

Dr. Hysi pse cilësohet si më i rëndësishmi ndër të gjithë eventet për stomatologët shqiptarë ky Kongres?

Po sepse ky është aktiviteti më i madh i stomatologjisë mbarëshqiptare ku marrin pjesë profesionistët e stomatologjisë në Shqipëri, ata të Kosovës, të Maqedonisë dhe pa dyshim që nuk janë të përjashtuar as shqiptarët e Malit të Zi dhe të Preshevës. Zhvillohet njëherë në 6 vjet në Shqipëri dhe çdo dy vjet në treva të tjera shqiptare. Pra, mbas 2 vjetësh do të organizohet në Prishtinë, pastaj në Shkup e më pas vjen sërish këtu.

Na tregoni diçka më shumë për përgatitjet e kongresit...

Është një organizim që mbledh kontributin e tre shoqatave: Shoqatës Dentare Shqiptare, Shoqatës së Stomatologëve të Republikës së Kosovës dhe Shoqërisë Stomatologjike të Shqiptarëve të Maqedonisë. Gjithashtu dua të theksoj se Fakulteti i Mjekësisë Dentare, pjesë e Universitetit Mjekësor të Tiranës, ka rolin më të rëndësishëm organizativ në këtë aktivitet, ndërsa një rol mbështetës kanë edhe universitetet e tjera si "Albanian University", Universiteti "Zoja e Këshillit të Mirë" dhe Universiteti "Aldent".
Në këtë aktivitet do të ketë 35 lektorë, nga të cilët 25 janë vetëm të huaj që vijnë nga institucione akademike italiane, turke, austriake, malteze apo gjermane. Pra kemi një miks lektorësh dhe një larmi tematikash sepse Kongresi i prek të gjitha fushat dhe specialitetet e stomatologjisë. Pjesa më e madhe e temave që do të diskutohen nga lektorët e huaj janë klinike, por ka edhe përjashtime si në rastin e koleges malteze, Dr. Paola Vassallo. Ajo drejton platformën "Better oral health" në Europë dhe do të flasë pikërisht për këtë platformë. Sa i takon lektorëve vendas, 10 janë nga Shqipëria kryesisht nga Fakulteti i Mjekësisë Dentare, dy nga Kosova dhe një nga Maqedonia.

Pse tri ditë një aktivitet i tillë?

Tri ditë janë një kohë relativisht e gjatë por edhe e shkurtër për këtë kongres. Nuk janë vetëm leksionet një orëshe, por edhe 60 prezantime orale që do të zgjasin rreth 10-15 minuta secila, ku kolegët që janë doktorantë, persona që aspirojnë për doktoraturë apo që e kanë përfunduar atë, si dhe stafet akademike do bëjnë prezantimet e studimeve të tyre klinike dhe epidemiologjike. Pra me gjithë leksionet janë diku te 95 prezantime në total.
Ne do të punojmë paralelisht në tre salla. Në fakt do të jenë 5 ose 6 salla të prenotuara: dy do të jenë për leksionet, një për prezantimet orale, një tjetër do të shërbejë si ekspozitë dhe panair, e gjithashtu një sallë do të jetë në dispozicion të work shop-eve, të cilat nuk janë pjesë e akreditimit. Jemi ende në proces për këto, por kemi disa kërkesa për prezantimin e work shop-eve klinike.

Sa është numri i krediteve që stomatologët do të marrin nga ky event?

Numri i krediteve përcaktohet nga Qendra Kombëtare e Edukimit në Vazhdim, ku ne kemi aplikuar dhe presim përgjigje. Sigurisht që duhet të marrim në konsideratë edhe ndryshimet që janë bërë me vendim të Këshillit të Ministrave lidhur me rregulloren dhe kriteret e reja të kreditimit të profesionistëve.
Por, shpresoj që stomatologët ta vlerësojnë siç duhet dhe të mos e shohin vetëm nga këndvështrimi i krediteve. Një ndër pyetjet që marrim më shpesh në kontaktet tona me stomatologët është se sa kredite ka dhe në momentin që bëhet një pyetje e tillë kuptohet se kemi të bëjmë me një koleg që nuk është i interesuar për të marrë informacion, por vetëm për të marrë kredite. Nëse ka njerëz që vërtet janë të interesuar për të dëgjuar le të vijnë të dëgjojnë, të pyesin, të sugjerojnë, të shkëmbejnë eksperiencat me kolegët për temat dhe sigurisht të marrin edhe kreditet.
Është një aktivitet gjithëpërfshirës dhe ne po mundohemi të bëjmë maksimumin e mundshëm që kolegët të kënaqen dhe ne të arrijmë qëllimin, që në fund të fundit i gjithë ky informacion të përkthehet në cilësi pune në shërbimin stomatologjik.