Po cilësia ka të bëjë me infrastrukturën e shërbimit, me përgatitjen e personelit stomatologjik, duke përfshirë këtu personelin primar por edhe atë ndihmës. Cilësia ka të bëjë edhe me materialet dhe produktet e përdorura nga ky shërbim në funksion të komunitetit. Mendoj se me kalimin e viteve cilësia ka ardhur duke u përmirësuar, pra në qoftë se do e krahasonim me para 5 apo 10 vjetësh sigurisht që ka përmirësim për secilën nga këto aspekte. Tani varet dhe se kë merr si temë reference.

Ky është një debat që ka rreth një vit që është hapur. Por unë nuk e kuptoj se si të njëjtët kolegë/distributorë që i sjellin këto materiale nga firma të autorizuara e të licencuara, thonë që nuk janë cilësore. Nuk mendoj se materialet që hyjnë në mënyrë të ligjshme në Shqipëri janë jo cilësore, pasi të gjithë distributorët që i shesin ligjërisht ato janë përfaqësues të kompanive serioze dhe këto shesin të njëjtin produkt si në Itali, si në Gjermani ashtu edhe në Shqipëri, e po ashtu kanë të njëjtën listë çmimesh si në këto vende. Pastaj nëse flasim për çfarë futet në mënyrë jo të ligjshme, për këtë duhet të ndërmerret një studim. Personalisht nuk kam ndonjë të dhënë të saktë. Por sa i takon materialeve jo cilësore, unë kam një pyetje tjetër: kush quhet jo-cilësor? Nëse i referohemi çmimit ka kategori materialesh që janë më të shtrenjta, ka edhe kategori që janë më të lira por që edhe këto shoqërohen me një certifikatë cilësie. E përderisa e kanë një certifikatë të tillë dhe janë testuar në vendin nga vijnë, më duket pak e vështirë të them që X material nuk është cilësor.

Kam përshtypjen fatkeqësisht që në mënyrë jo korrekte po konkurrohet me çmimin. Shërbimi shëndetësor në përgjithësi, jo vetëm ai stomatologjik, nuk mund të përdorë çmimin si mjet konkurrence në 90% të rasteve. Çmimi nuk është primari, duhet të jetë cilësia e shërbimit që ofrohet. E këtu nuk ia vë fajin materialeve që përdoren se sa numrit të madh të stomatologëve që kanë dalë këto vitet e fundit nga arsimi publik apo privat, i cili nuk i përgjigjet kërkesave që ka tregu për këtë lloj profesioni.

Në të gjitha vendet e Bashkimit Evropian apo edhe në Shtetet e Bashkuara e Kanada profesionet e shëndetësisë janë të kontrolluara me një numër të përcaktuar pranimesh, mbështetur kjo në studime mbi rritjen e popullsisë, niveleve të sëmundshmërisë dhe indikatorë të tjerë. Këtu te ne kjo nuk ndodh. Dalja e këtij numri të madh profesionistësh të të njëjtës fushë, do të reflektohet në një konkurrencë më të madhe e rrjedhimisht në uljen e çmimit. Por, ulja e çmimit bëhet në disa raste në kurriz të cilësisë, sepse të gjithë ne e dimë që çdo shërbim që marrim, mjekësor ose jo, ka një kosto. Shoh shpesh në media kolegë që reklamojnë tarifat me të cilat punojnë, ndërkohë mendoj se në shëndetësi nuk duhet të ketë reklama për tarifa. Duhet të ketë për shërbimin dhe për specialitetet që ofrohen, por kurrsesi për tarifat.

Sa i takon distancës është e vërtetë se një pjesë e mjekëve që jetojnë në rrethe nuk mund të mbulohen me aktivitetet e edukimit në vazhdim për shkak se aktivitetet kanë kosto dhe normalisht nuk mund të shkohet në një rreth ku ka 3-5 dentistë. Kështu që në ato zona e kemi pasur pak të vështirë për të ofruar aktivitetet të cilat i kemi zhvilluar kryesisht në Tiranë, Durrës, Elbasan. Lidhur me tarifat, të paktën për aktivitetet që organizon Shoqata Dentare Shqiptare kanë qenë gjithnjë tarifa të mbështetura mbi kostot që mbartin aktivitetet. Pra SHDSH nuk i organizon ato për qëllime ekonomike sepse ne nuk jemi firma distributorësh, ne organizojmë aktivitete në bashkëpunim me fakultetin, por kuptohet që kur na jepet mundësia edhe me lektorë të huaj, të cilët kanë dhe ata koston e tyre, udhëtimi, qëndrimi etj.

Disa mjekë me të drejtë e kanë të vështirë për shkak dhe të rënies së punës. Cila është zgjidhja, është ajo që thashë në fillim: e para reduktimi i numrit të stomatologëve dhe e dyta edhe aktivitetet online janë një zgjidhje. Këto aktivitete mjeku mund t'i ndjekë pa u larguar nga ambienti i punës dhe sigurisht që kjo do t'i jepte një ndihmesë përmirësimit të njohurive të tyre. Megjithatë unë jam për një kombinim dhe balancim të të dyjave. Mendoj që është një ide pozitive, për ne është e re, ndërsa në vendet e tjera ka vite që është aplikuar.

Më datë 18 maj kemi një aktivitet në ortodonci me një profesor italian, i cili do të zhvillohet këtu në fakultetin e mjekësisë dentare. Në datat 6 dhe 7 nëntor do të zhvillohet Kongresi mbarëshqiptar i Stomatologjisë, i cili do të mbledhë dentistët nga Shqipëria, Maqedonia dhe Kosova. Është një event i madh që do të organizohet në Hotel Tirana, ku do të mblidhen mbi 1000 mjekë stomatologë, kështu që gjatë periudhës maj-nëntor do të merremi me organizimin e këtij aktiviteti që është i veçantë për stomatologjinë shqiptare.