Prosecco dëmton buzëqeshjen. Lajmi anglez i përgënjeshtruar nga ekspertët

Sulm ndaj Prosecco-s! Vjen nga Britania, saktësisht nga kolonat e Daily Mail dhe The Guardian. Akuza ka të bëjë me praninë e anhidridit të karbonit që bashkuar me alkoolin dhe sheqerin, sulmon smaltin e dhëmbëve duke rritur ndjeshmërinë dhe riskun për korrozion, siç është pretenduar nga Damien Walmsley, konsulent shkencor i British Dental Association.
"Lajm qesharak", e ka përkufizuar ministri i Politikave bujqësore Maurizio Martina dhe të gjithë dyshojnë për një sulm ndaj një delikatese italiane nga e cila konsumohen, në Britani rreth 40 milion litra në vit.

Fjala e ekspertëve nëpërmjet portalit të specializuar Odontoiatria33:
"Që pijet me pH të ulët janë erozive për sa i përket smaltit është një fakt i njohur prej më shumë se 20 vjetësh" nënvizon Massimo Galiani, docent i Sëmundjeve odonto-stomatologjike në universitetin e Studimeve, Milano. "Një kërkim shumë i kujdesshëm publikuar në revistën më të madhe të përgjithshme amerikane (Jada) raporton të dhënat e pH të gjetura në më shumë se 300 pije të disponueshme në SHBA: në këtë dalim në përfundimin se vetëm 7% e këtyre ka një pH jo të rrezikshëm për integritetin e smaltit dentar. Ndër këto pothuajse 40% ka një pH më të ulët se 3, ose një vlerë që, pavarësisht studimeve laboratorike të kryera mund të shpërbëjë pjesën sipërfaqësore të smaltit dhe me ekspozime për më pak se 10 minuta. Atëherë përse të shqetësohemi për Prossecco-n në veçanti?"

Luka Levrini, drejtor i Qendrës së kërkimeve universitare oro-kranio-faciale të Universitetit Insubria të Varese-s dhe autor i librit "La dieta del Sorriso" (Dieta e Buzëqeshjes): "Nuk më rezultojnë studime specifike që dëshmojnë se prosecco ka një fuqi erozive për dhëmbët, ndonëse vera e bardhë, për sa i përket aciditetit mund të shpërbëjë smaltin. Përballë këtij aspekti ekzistojnë dhe anë pozitive: vera ka një veprim baktericid kundrejt streptokokut; disa polifenole nuk lejojnë adezionin e baktereve në smalt dhe shkëpusin bakteret pasardhës; në pijetarët e moderuar është e pranishme një sasi dhe cilësi më e vogël e baktereve të përgjegjshëm për sëmundje të gingivave. Nëse merret në sasi të moderuar gjatë vakteve dhe gjatë një aperitivi ndoshta duke konsumuar ushqime që " ushqejnë" në mënyrë funksionale smaltin nuk krijohen absolutisht dëme".

Përktheu: Erjola Taga