|

Kreditet e profesionistëve të shëndetësisë, QKEV publikon Raportin Vjetor 2016

3.634 mjekë, 1.845 farmacistë dhe 1.752 stomatologë kanë mundur të përmbushin detyrimin marrjes së krediteve mbi kufirin minimal vjetor të përcaktuar nga Qendra Kombëtare e Edukimit në Vazhdim për vitin 2016. Dentist33 ka siguruar Raportin Vjetor nga QKEV i cili pasqyron statistikat mbi kreditimin e profesionistëve dhe aktivitet e zhvilluara për ta. 2016 ka qenë gjithashtu viti i nisjes së certifikimit të detyrueshëm për infermierët, mamitë dhe ndihmës/farmacistët, interesi i të cilëve ka qenë përgjithësisht i ulët. Kështu për shembull 13.037 infermierë rezultojnë pa kredite, të justifikuar edhe nga fakti se nuk janë zhvilluar aktivitete të mjaftueshme për këtë kategori dhe nuk është përcaktuar ende një detyrim minimal vjetor kreditesh për ta.
Nga ana tjetër QKEV nënvizon se në krahasim me 2015-n ka pasur një rritje prej 33% të numrit të aktiviteteve të akredituara dhe në total janë 612 të tilla. Për sa i takon  përmbushjes së kërkesave të programit të certifikimit vihet në dukje se 1.548 mjekë, 757 stomatologë,  510 farmacistë figurojnë pa kredite të regjistruara në QKEV. Megjithatë ky numër mund të mos pasqyrojë gjendjen reale sepse shumë profesionistë merren me procesin e regjistrimit të krediteve vetëm në momentin e rinovimit të lejes së ushtrimit të profesionit.
Një nga shqetësimet që ngrihet në raport është angazhimi i pakët i institucioneve publike të kujdesit shëndetësor në ofrimin e aktiviteteve të edukimit në vazhdim. "Konstatohet se drejtuesit e spitaleve dhe qendrave shëndetësore ende nuk e perceptojnë nevojën e investimit në edukimin e personelit si një investim në cilësinë e kujdesit shëndetësor. Edhe pse qendrat shëndetësore kanë një detyrim kontraktual me FSDKSH për përdorimin e 1% të buxhetit për edukimin në vazhdim, ende shumica prej tyre nuk e zbatojnë këtë detyrim", shkruhet në raport.
Programi katërvjeçar i certifikimit për mjekët, farmacistët dhe dentistët e punësuar në sektorin publik dhe atë privat ka nisur në vitin 2015 dhe përfundon në 2018-n. Gjatë kësaj periudhe secila kategori duhet të mbledhë përkatësisht 120 kredite (mjekët), 60 kredite (farmacistët dhe dentistët). Ndërsa infermierët, mamitë dhe ndihmës/farmacistët duhet të grumbullojnë 40 kredite  në total gjatë ciklit 2016-2019.

Lexoni të plotë Raportin Vjetor

Për të votuar duhet të vendosni kredencialet tuaja në Medikey

Interesant ( 73 votim / mesatar 3 )