"Po ju tregoj klinikën!" Një moment i rëndësishëm, por jo gjithmonë i marrë në konsideratë për besnikërinë e raportit pacient - klinikë

Pacienti, përgjithësisht, nuk e di sesa punohet për shërbimet që ofrohen. Njeh paksa rëndësinë e sterilizimit, por nuk njeh as metodat as vështirësitë, ashtu siç nuk e di se cilët janë personat që "bëjnë xhiro" nëpër klinikë dhe që merren me shëndetin e tij.
Shpjegimi i roleve dhe titujve të klinikës që i përkasin skuadrës stomatologjike shërben për t'i dhënë garanci pacientit dhe për të bërë më të ndërgjegjësuar ekipin. Në praktikën klinike kemi verifikuar, me një rritje të përqindjes së preventivëve të pranuar, rëndësinë e prezantimit të pacientit me klinikën, organizimin dhe ekipin e saj.

Cilësia e shërbimit të perceptuar jepet nga mospërputhja e pritshmërive të pacientit me elementët që asimilon gjatë këtij rrugëtimi, seanca operative, koha që i dedikohet, disponueshmëria e ekipit.
Asistenti/ja shoqëron pacientin nëpër ambientet e klinikës duke nxjerrë në pah pikat e forta: linjën e sterilitetit, diplomat dhe kualifikimet e profesionistëve, sallën e rrezeve, repartin e higjienës orale dhe punën që zhvillohet në mënyrë konstante për azhornimin.

Cilat janë pikat kryesore ku duhet të insistohet?
1. Ekspozimi në korridor i të gjitha diplomave, kualifikimeve dhe specialiteteve të ASO, higjienistëve dhe stomatologëve;
2. Akreditimi;
3. Linja e sterilitetit, duke evidentuar se cilët persona e kryejnë dhe kur, testet e vlerësimit të autoklavave etj.;
4. Sallat operative, duke i treguar paketat e instrumenteve të sterilizuara që mbajnë etiketa që tregojnë datën, kohën e skadencës etj.;
5. Sallën e rrezeve duke i shpjeguar rëndësinë e aparaturave dixhitale për të reduktuar sasinë e rrezeve të emetuara;
6. Sallën e pritjes ku janë ekspozuar disa postera të produkteve nga ekipi i klinikës që tregon impenjimin që kanë ata për përditësimin e njohurive në mënyrë të vazhdueshme dhe formimin e të gjithë skuadrës.
Nuk mjafton që klinika të jetë e bukur dhe mikpritëse. Kënaqësia e klientit varet nga perceptimi i cilësisë dhe sigurisë që i transmetojmë derisa mund të ndjejë sesi për të gjithë skuadrën është i rëndësishëm shëndeti i tij. Cilësia është një impenjim dhe një investim i vazhdueshëm. Përfshirja e pacientit në këtë "vizitë të drejtuar" të shkurtër është një nga mënyrat për të zhvilluar këto ndjesi.

Ashtu siç thotë profesor Carlo Guastamacchia: - Gjërat e veçanta e bëjnë diferencën.

Nën kujdesin e: Cinzia Artoni dhe Maria Crupi, ASO të certifikuara në Regjionin e Lombardisë
Ky punim ka fituar çmimin Alessandro Melli si Posteri më i mirë gjatë Kongresit të XXI COI-AIOG

Përktheu: Valbona Spahia