Shfuqizimi i ligjit për sigurimet: Diferenca e kontributeve të paguara gjatë periudhës janar-qershor nuk kthehet

Gjykata Kushtetuese shfuqizoi dje ligjin për profesionet e lira të miratuar në dhjetor të 2015-s, për mbledhjen e kontributeve të detyrueshme të sigurimeve shoqërore dhe shëndetësore, të ndryshuar. Ndryshimi konsistonte në atë që paga mbi të cilën mbaheshin kontributet e të vetëpunësuarve mes të cilëve mjekë, farmacistë, dentistë, avokatë, arkitektë etj., përcaktohej nga qeveria duke shumëfishuar kështu kontributet që duhet të derdhnin këta profesionistë.

Ligji ngjalli kundërshtime të ashpra nga secili grup interesi dhe protesta, por duke mos gjetur dakordësinë për rrëzimin e ndryshimeve, Dhoma Kombëtare e Avokatisë në emër të gjitha kategorive që prekeshin e ankimoi ligjin në Gjykatën Kushtetuese. Kjo e fundit pasi analizoi pretendimet e ngritura nga pala kërkuese, si dhe ato të subjekteve të interesuara, Kuvendi i Republikës së Shqipërisë, Këshilli i Ministrave, Instituti i Sigurimeve Shoqërore, vendosi të pranojë kërkesën duke rikthyer nga ky muaj pagimin e kontributeve bazuar në ligjin e vjetër prej 6.556 lekësh në muaj.

Nga ana tjetër Koordinatori i Asamblesë së Profesioneve të Lira, z.Erion Dizdari ka pohuar për "GSH" se të ardhurat e sigurimeve që profesionistët kanë paguar për periudhën janar-qershor, nuk do të kthehen pasi atëherë ka funksionuar ligji i shfuqizuar dje.