Dita për shëndetin e gruas, specifikat femërore që lidhen me zgavrën e gojës

"Disa probleme të shëndetit oral janë më të lidhura apo më të përhapura në seksin femër": këtë zbulon Silvio Abati (në foto), profesor i Sëmundjeve odontostomatologjike, në Universitetin e Milanos, me rastin e Ditës së parë kombëtare për shëndetin e gruas themeluar nga Ministria e Shëndetësisë në 22 prill dhe dedikuar Rita Levi Montalcini, lindur pikërisht në këtë ditë në 1909.

Abati, drejtor në Strukturën operative të Day-surgery pranë Departamentit të mirëqenies së odontostomatologjisë në Spitalin San Paolo në Milano, sjell shembujt më të rëndësishëm të kësaj specifike femërore: "Mbi të gjitha sëmundjet autoimune dhe imunopatologjike të mukozave orale, si lichen planus oral, pemfigoide e mukozave, sindromat e djegies së gojës; në radhë të dytë problemet parodontale dhe rehabilituese të provokuara nga osteoporoza në postmenopauzë dhe së fundmi efektet negative sistemike të sëmundjes parodontale dhe të baktereve parodontopatogjene për një shtatzëni të mirë dhe në shtimin e riskut të efekteve anësore për nënën dhe fetusin."

Ndryshimet e shumta hormonale që ndodhin gjatë gjithë jetës së gruas luajnë dukshëm një rol domethënës. "Hormonet seksuale femërore" - shpjegon Abati - "kanë efekte të rëndësishme në florën bakteriale orale (i ashtuquajturi biofilm oral) duke rritur sasinë e mikrobeve patogjene për gingivat dhe duke ulur efikasitetin e përgjigjes imunitare ndaj mikrobeve, me shtimin e inflamacionit gingival, të gjakrrjedhjes, të halitosis gjatë shtatzënisë dhe në momente të veçanta të ciklit mujor femëror; pas menopauzës reduktimi i sasisë së hormoneve qarkullues mund të ketë efekte negative në tropizmin e mukozës orale."

Më pas ka një periudhë të veçantë që kërkon vëmendje shtesë, ajo e shtatzënisë gjatë së cilës "është e rëndësishme të ruajmë nivele optimale të higjienës orale dhe të shëndetit të indeve gingivale; për këtë është thelbësore të shkoni për një kontroll stomatologjik sapo të zbuloni se prisni një fëmijë, të kryeni pastrimin profesional të dhëmbëve, të keni një instruksion adekuat të manovrave të higjienës orale. Është i një rëndësie thelbësore që të ndaloni edhe pirjen e duhanit, jo vetëm për shëndetin e përgjithshëm por edhe për atë të gojës dhe të vetë fëmijës."

Adelmo Calatroni

Përktheu: Erjola Taga