Dentistët në plan të parë kundër antibiotikorezistencës. Nga CED dekalogu mbi përdorimin (dhe përshkrimin) e përgjegjshëm

Përdorimi i antibiotikëve në stomatologji nuk ka marrë deri më tani vëmendje të madhe, edhe pse njihet se këto barna janë ndër më të zakonshmit që përshkruhen nga dentistët, më shumë se analgjezikët, antiviralët apo antimykotikët.

Për këtë temë kujdeset një ndër grupet e Council of european dentists (Ced), shoqata që i jep zë 340 mijë dentistëve të Bashkimit Europian dhe që drejtohet nga italiani Marco Landi. Kohët e fundit grupi që interesohet kryesisht për problemin e antibiotikorezistencës, është mbledhur për të diskutuar aktivitetet e tij për vitin në vazhdim dhe në veçanti për të përgatitur një event publik të parashikuar në qershor. Gjithashtu është vendosur se Dita Europiane për shëndetin oral të këtyre viteve do ti dedikohet pikërisht këtij argumenti.

Tashmë që nga 2014 Ced ka adoptuar një zgjidhje për sa i përket rezistencës ndaj antibiotikëve, e përqendruar në një përdorim të përgjegjshëm dhe në rolin e dentistit për të luftuar përhapjen në rritje të baktereve rezidente.
Pasojat e këtij fenomeni janë shumë të rënda dhe po shtohen rastet e infeksionit të cilat nuk mund të trajtohen, duke ngritur kështu shqetësimin e një rikthimi në epokën ku antibiotikët nuk ishin zbuluar akoma.

"Është e nevojshme" - shkruhet në rezolutën e dentistëve evropianë - "që stomatologët të përshkruajnë antibiotikë vetëm kur janë të përshtatshëm dhe të nevojshëm; duhet të merren në shqyrtim vetë zakonet përshkruese dhe mundësisht ti modifikojmë, duke pasur parasysh faktin se kjo vëmendje mund të sjellë një ndryshim të ndjeshëm dhe mund të ndikojë në zhvillimin e shtamave bakteriale rezistente".

Për këtë arsye Ced ka lëshuar një dekalog, për ta vendosur në vëmendjen e të gjithë profesionistëve europianë që operojnë në fushën e shëndetit oral.
1. Dentistët duhet, si mjekët dhe veterinerët, të bëhen të ndërgjegjshëm për përfshirjen e përdorimit të papërshtatshëm të antibiotikëve.
2. Një përshkrim i përgjegjshëm në të gjithë disiplinat shëndetësore do të bëjë të mundur ruajtjen e efikasitetit të barnave antibiotike për situata në të cilat janë realisht të nevojshme.
3. Nëse numri i përshkrimeve në stomatologji do të reduktohet, seleksionimi i shtamave bakteriale rezistente do të ndodhë me më pak frekuencë.
4. Kur përshkrimi i antibiotikëve këshillohet, zgjedhja e llojit të antibiotikut dhe dozimi duhet të optimizohen me qëllimin për të përftuar një rezultat terapeutik efikas dhe për të shmangur krijimin e rezistencave.
5. Profesionistët që operojnë në sektorin e stomatologjisë duhet të përmbushin çdo sforcim të mundshëm për të parandaluar transmetimin e kryqëzuar të baktereve rezistente.
6. Është e rëndësishme që edhe popullsia në përgjithësi të kuptojë rëndësinë për të ulur përdorimin e antibiotikëve e të përdoren vetëm në rastet kur infeksioni i rëndë e kërkon.
7. Të arrish nivele të ulëta dhe të përshtatshme të përshkrimeve të antibiotikëve mund të paraqesë një sfidë për dentistët, për shkak të presionit të ushtruar nga pacientët por është e nevojshme që ta përballojmë me dijeni të plotë.
8. Antibiotikët nuk duhet të vendosen në shitje nëpërmjet Internetit për persona jo të autorizuar.
9. Dentistët duhet të mbështesin përmirësimet në njohjen dhe në kuptimin e antibiotikorezistencës duke u informuar në mënyrë aktive dhe duke marrë të dhëna shkencore rreth çështjes.
10. Dentistët duhet të inkurajojnë investimet në kërkimin dhe në zhvillimin e barnave të reja dhe të sigurohen që të hidhen menjëherë në treg.