Zbulohen bakteret e "mira" që mbrojnë gojën. Prania e tyre mund të "tregojë" kush rrezikon për karies

Bashkëjetojnë në brendësi të gojës me shumë baktere të ngjashme me to, por mund të konsiderohen "të mira" nga momenti që ndihmojnë në mbajtjen nën kontroll të baktereve "të këqija". Këta miq të gojës janë identifikuar kohët e fundit nga një grup kërkuesish amerikanë që kanë publikuar rezultatet e punës së tyre në revistën "Applied and environmental biology".

"Për të qëndruar e shëndetshme goja ka nevojë për një ambient neutral", shprehet Robert Burne i Universitetit të Floridës dhe koordinator i kërkimit, duke kujtuar se nëse ambienti bëhet shumë acid shtohet risku i kariesit dhe probleme të tjera dentare. Bëhet fjalë thjesht për kimi: duke e thjeshtuar në maksimum mund të thuhet se bakteret e "këqija" që gjenden te dhëmbët prodhojnë acid që shpërbën vetë dhëmbin.

"Në studimin tonë jemi përpjekur të kuptojmë në detaj se cilat mekanizma dhe aktivitete janë përgjegjëse për shtimin e aciditetit në zgavrën e gojës", shpjegojnë autorët, që për të thelluar kërkimin rreth baktereve të reja kanë përftuar së fundmi një financim shumë të konsiderueshëm nga Us national institute of dental and craniofacial research.

"Shtama e re e identifikuar - që quhet A12 dhe bën pjesë në shtamën e gjerë të streptokokëve - duket se ka efekt pozitiv për shëndetin e gojës në ndryshim nga shumë shtama të tjera që gjenden në dhëmbë", saktëson Burne që bashkë me kolegët e tij ka segmentuar gjithashtu të gjithë pasurinë gjenetike të kësaj shtame bakteresh me shpresën se së shpejti do të arrijë në një aplikim klinik të këtyre zbulimeve laboratorike.

"Prania e këtyre baktereve të mira në zgavrën e gojës mund të përdoret për të kuptuar se cili rrezikon më shumë për karies dhe probleme dentare", shton Marcelle Nascimento, bashkautore e studimit. Më pas saktëson: "Më parë është e nevojshme të tregojmë se prezenca e baktereve A12 është e lidhur me një risk më të ulët kariesi". Por nuk mjafton. Nëse studimet e ardhshme do të konfirmojnë rolin mbrojtës të këtyre shtamave të streptokokut, edhe mund të arrihet në një tabletë që i përmban dhe që funksionon si një trajtim i mirëfilltë për parandalimin e kariesit.

Redaksia DICA33

Përktheu: Erjola Taga