Orto - pedodontiste dhe nënë. Një vlerë e shtuar!

Të dhënat që i përkasin situatës së punës në vitet e fundit për stomatologet femra vënë në dukej sesi numri i femrave në specialitetet e ortodoncisë dhe pedodontisë është gjithnjë e më i lartë në krahasim me meshkujt.
Roli i trefishtë i gruas - profesionistes - nënës duket tashmë se është konsoliduar dhe duket se vështirësia më e madhe është ajo që të pajtojë punën dhe familjen, duke kërkuar që të mbetet gjithnjë e më efikase dhe konkrete.

Por në vend të ndalemi te vështirësitë e të tilla kushteve, do të ishte shumë më interesante dhe e dobishme të mendohej se ky realitet mund të bëhet vërtetë një cilësi themelore në praktikën e përditshme klinike si ortodonte gjatë takimeve me fëmijët shpesh të frikësuar nga përparëset, fëmijë që janë të vështirë për t'u trajtuar, të ndikuar nga eksperiencat e kaluara negative, me adoleshentë që janë në ankth për të hequr atë "të urryerin" aparat ortodontik dhe me prindër gjithnjë e më të vëmendshëm ndaj shëndetit oral të fëmijëve të tyre.

Duke mos marrë si të mirëqenë disa karakteristika themelore si kualifikimi, përgatitja, kompetenca dhe besueshmëria, a ka ndonjë gjë që mund të bëjë ndryshimin? Të qenit grua - nënë mund të jetë një vlerë e shtuar?
Eksperienca e mëmësisë mund të ndikojë në mënyrë pozitive mbi praktikën e përditshme klinike dhe mund të bëjë që të jenë më të ndjeshme ndaj disa tematikave dhe problematikave, më të vëmendshme ndaj kërkesave të pacientëve të vegjël dhe të prindërve të tyre.
Është e mundur që eksperienca e të qenit nënë të jetë një kurs formimi i vërtetë që do të lejojë të ketë qëndrime dhe sjellje themelore për ndërtimin e raportit me pacientët, duke marrë kështu një sërë informacionesh dhe nocionesh që nuk do mund të mësohen kurrë në një kurs teoriko - praktik.
Pra mund të jenë më efikase, më të motivuara dhe mbi të gjitha më të besueshme përballë pacientëve dhe prindërve të tyre duke mishëruar kështu figurën e stomatologes pediatre që merret me pacientin e vogël duke e shoqëruar nga fëmijëria deri në adoleshencë.
Të qenit profesioniste - nënë mund të përfaqësojë një as nën mëngë dhe është e mundur të konfirmohet kjo në studimin fiziologjik njerëzor, në analizën e zonave të trurit dhe te stilet e funksionimit në të tilla zona, të ndryshme midis dy gjinive.

Duke nxjerrë në pah atë që ka dalë në dritë nga reflektimet bëra, në brendësi të ekipit të klinikës dentare prania e figurës së orto - pedodontistes bëhet kryesore për të bërë pacientët personal besnikë që kur janë të vegjël dhe për të krijuar persona që nuk kanë frikë nga dentisti.
Të qenit grua dhe nënë në zhvillimin e këtij profesioni paraqet një vlerë të shtuar sepse, falë dhuntive dhe ndjeshmërisë natyrale dhe të lindur, është e mundur që të kujdeset vërtetë për pacientët e vegjël me autoritet dashamirës. Kjo do të rezultojë fituese në raportin direkt mjek - pacient i vogël, por edhe me prindërit e tyre, që dëshirojnë të kenë një pikë referimi të sigurt për shëndetin e fëmijëve të tyre, që të jetë e disponueshme të dëgjojë dhe të kuptojë.

Nëse besohet te kjo, mund të kemi figura profesionale të rinovuara, të afta për të ofruar hapësira të reja dhe të shohin përtej vështirësisë dhe përtej sakrificave të pashmangshme dhe kompromiseve që një grua që punon duhet të përballojë çdo ditë në fushën e betejës!
Një përkushtim konstant, profesional dhe i organizuar mund të japë vërtetë frute nëse vihet qëllimi që jo vetëm të garantojmë shëndetin oral të atij që na drejtohet, por edhe të sigurojmë një cilësi më të mirë të jetës.

Përmbledhje nën kujdesin e: Maria Giovanna Rossini

Përktheu: Valbona Spahia