Certifikimi i dentistëve, Entela Shehu: Presim vendimin e MSH për datën e provimit. Numri i të regjistruarve, shumë i ulët

29 shkurti ishte afati i fundit për regjistrimin në provimin e certifikimit të mjekëve, farmacistëve dhe dentistëve që nuk përmbushën detyrimet e programit të parë të certifikimit, dhe ashtu si në provimin e parë të organizuar në dhjetor 2015, numri i të regjistruarve është tejet i ulët përballë numrit të përgjithshëm të profesionistëve që s'kanë plotësuar kreditet.

"Dje ishte data e fundit për regjistrimin në provim por vetëm 100 profesionistë janë regjistruar në të, një pjesëmarrje e ngjashme me atë të provimit të parë", shprehet për Doktor33 kreu i Qendrës Kombëtare të Edukimit në Vazhdim, Znj.Entela Shehu. Kujtojmë se numri i mjekëve farmacistëve dhe dentistëve që nuk plotësuan kreditet e detyrueshme është rreth 10 herë më i lartë, ku vetëm dentistë janë rreth 364.
Këta profesionistë jo vetëm që e neglizhuan programin e edukimit në vazhdim në pesë vitet e kaluara, por të njëjtën gjë vazhdojnë të bëjnë edhe tani kur ju jepet për herë të dytë mundësia për të mos rrezikuar vendin e punës. Sipas deklaratave të mëhershme të Ministrisë së Shëndetësisë dhe QKEV-së, profesionistët që nuk shlyejnë detyrimin e kreditimit do t'ju hiqet licenca dhe automatikisht e drejta për të ushtruar profesionin.

E pyetur nëse është caktuar një datë për zhvillimin e provimit, i parashikuar për nga mesi i muajit mars, znj.Shehu thotë se datën e vendos Ministria e Shëndetësisë dhe se deri tani nuk ka asnjë vendim të ardhur nga kjo e fundit.
Ende nuk dihet se çdo të vendosë ministria lidhur me provimin, por nuk përjashtohet mundësia e shtyrjes së tij duke parë edhe numrin e ulët të regjistrimeve.
Në total janë 1077 mjekët, farmacistët dhe dentistët që duhet të japin provimin e certifikimit.

Përgatiti: Dorina Gjuzi