Angli, shëndeti oral më i keq midis fëmijëve në shkollat speciale

Fëmijët me nevoja të veçanta, që frekuentojnë shkollat speciale angleze, kanë nivele të kariesit dentar pak më të ulëta në krahasim me bashkëmoshatarët e tyre, por kanë mundësi më të mëdha që dhëmbët e tyre të hiqen dhe në përgjithësi, një shëndet oral më të keq: kjo shënohet në një sondazh të botuar nga Public Health England (Phe) , një agjenci ekzekutive e departamentit të shëndetitësisë që operon në Mbretërinë e bashkuar prej disa vitesh.

Ky hetim, i pari në llojin e tij, tregon për më tepër se fëmijët me dhëmbë të prishur të frekuentojnë shkollat Send (schools for children with severe special education needs and disabilities) kanë një higjenë orale më të keqe dhe që numri i fëmijëve që kanë pllakë bakteriale është dyfish më i madh në krahasim me ata që frekuentojnë shkollat e tjera: në moshën 5 vjeçare përqindjet janë përkatësisht 4% dhe 2% dhe për moshën 12 vjeçare shkojnë në 20% dhe 10%.
Duke u ekzaminuar në detaje, të dhënat tregojnë një ndryshueshmëri të rëndësishme nga një zonë në tjetrën në vend dhe në rajonet e veriperëndimit të Anglisë, ekonomikisht më pak të zhvilluara, regjistrohet një shëndet oral më i dobët.

Në përgjithësi, 22% e fëmijëve 5 vjeç që frekuentojnë shkolla të veçanta ka patur të paktën një episod me karies (33% në rajonet veriperëndimore kundër 10% në juglindje), dhe rritet në 29% në moshën 12 vjeç (edhe në këtë rast shkon nga 41% në 22%). Te fëmijët me karies, në moshën 5 vjeç janë prekur mesatarisht katër dhëmbë qumështi dhe në moshën 12 vjeç dy dhëmbë të përhershëm. Në të dyja grupmoshat, fëmijët me vështirësi më të madhe në sjellje, emocionale dhe sociale janë ata që tregojnë nivele të kariesit më të lartë, 28% mesatarisht në moshën 5 vjeç dhe 42% në moshën 12 vjeç.
Sandra White, drejtoreshë, te Phe, në seksionin që merret me shëndetin oral, ka kujtuar rolin e sheqerit në formimin e kariesit dhe që fëmijët marrin trefish më shumë në krahasim me rekomandimet zyrtare, ndërsa një parandalim i duhur dhe një higjienë orale e saktë mund të luftojnë këtë patologji.

"Pavarësisht se fëmijët që frekuentojnë shkollat speciale kanë pak më pak karies në krahasim me ato që frekuentojnë shkolla të tjera" - ka deklaruar White - "nivelet mbeten sidoqoftë shumë të larta dhe duhet të vëmë re se bëhet fjalë për individë veçanërisht të pambrojtur dhe që kërkojnë një përpjekje shtesë në aspektin e parandalimit dhe trajtimit. Autoritetet lokale, si Sistemi shëndetësor kombëtar, duhet të angazhohet për t'i bërë të disponueshme shërbimet stomatologjike me personel posaçërisht të trajnuar për të përballuar në mënyrën më të mirë komplekset dhe nevojat e fëmijëve."

Renato Torlaschi

Përktheu: Valbona Spahia