Gratë shtatzëna, shumë pak është bërë në drejtim të parandalimit të shëndetit oral. Ankesa vjen nga një kërkim amerikan

Një rishikim sistematik i kohëve të fundit i literaturës ka ekzaminuar impaktin e ndërhyrjeve të promovimit të shëndetit oral gjatë shtatzënisë. I kryer nga një grup studiuesish të Universitetit të Floridës Jugore, kërkimi supozohet të jetë hapi i parë drejt identifikimit të ndërhyrjeve të mbështetura nga prova shkencore por ende nuk janë kthyer në praktikë, me përjashtim të ndonjë rasti.
Në fakt, shpjegojnë autorët, edhe nëse studime të ndryshme kanë nënvizuar rëndësinë e shëndetit oral në periudhën e shtatzënisë dhe disa indikacione janë sjellë nëpërmjet udhëzimeve të ndryshme, mbetet shumë i vështirë përkthimi i tyre në përpjekje efikase promovimi.

Në kompleks, rishikimi ka sjellë identifikimin e shtatë ndërhyrjeve, të kryera në tre kombe: pesë në Kanada, një në Shtetet e Bashkuara dhe një në Lituani. Pavarësisht heterogjenitetit të pritshëm, të gjitha ndërhyrjet janë kryer në fushën e kujdesit prenatal. Edhe pse më shumë se shtatë gra nga dhjetë në Shtetet e Bashkuara marrin trajtime gjatë tremujorit të parë të shtatzënisë - periudhë kjo ideale për të vënë në zbatim ndërhyrje promovimi për shëndetin për muajt në vijim - asnjë nga studimet e identifikuara në literaturë nuk ka dokumentuar ndërhyje të kryera në fushën stomatologjike.

Informacionet e transmetuara te gratë dhe metodikat e përshtatura kanë qenë të ndryshme dhe kanë përfshirë vizita prenatale personale ose në grup, instruksione për higjienën orale, lexime, prezantime audio-vizive dhe furnizim të materialeve të dobishme për kujdesin e dhëmbëve. Megjithatë, vetëm një nga shtatë studimet e zgjedhura është fokusuar në mënyrë specifike mbi shëndetin e gruas, për shembull duke dhënë indikacione për sjelljet që duhen përshtatur për të parandaluar sëmundjen parodontale gjatë shtatzënisë. Në raste të tjera, vëmendja ka shkuar për shëndetin e fëmijës, përsa i përket temës sesi mund ta parandalojmë kariesin që në moshë të vogël.

Rezultatet me këtë rishikim përforcojnë mendimin e autorëve se ka ende shumë për të bërë në një fushë në të cilën njohuritë shkencore tregojnë qartazi nevojën për të mbrojtur shëndetin oral të foshnjës edhe të gruas në shtatzëni, por në praktikë po bëhet vërtetë pak, ndërkohë që duhej të viheshin protokollë për ndërhyrjet që duhen përshtatur në mënyrë sistematike.

Renato Torlaschi

Përktheu: Valbona Spahia