Nga qelizat staminale mundësi të reja për rigjenerimin kockor te lezionet post-traumatike. Rezultatet e një studimi në SHBA

Lezionet traumatike që përfshijnë fytyrën janë shumë të zakonshme, gjysma e këtyre lezioneve lidhen me humbjen e dhëmbëve dhe të indit kockor që i mbështet. Menaxhimi klinik i pacientëve me humbje të mëdha të indit të mandibulës, është shumë i vështirë, veçanërisht nëse nuk arrihet të garantohet mbështetja e duhur te elementët dentar që mungojnë.

Studiuesit e Universitetit të Dentistrisë në Miçigan (UMSoD) të Ann Arbor (Miçigan, SHBA) të drejtuar nga Darnell Kaigler DDS, prej vitesh përdorin qelizat staminale për rigjenerimin e kockës.
"Avantazhi kryesor i terapisë me qeliza staminale" - shkruan Darnell Kaigler në një website të njohur të sektorit - "është që përdor qelizat e pacientit për të rigjeneruar indet, duke reduktuar ose kufizuar përdorimin e biomaterialeve. Procedimi që kryhet në anestezi lokale, përshpejton shërimin e indeve në krahasim me injektimet tradicionale në kockë dhe kufizon dhimbjen post - operative."
Qelizat staminale paraardhëse të marra nga palca e kockës, shpjegon ai, futen në korniza të posaçme me trikalcium fosfat që formojnë strukturën e mbështetjes.

Nëse humbja kockore është më e përhapur përdoren korniza më të forta, si p.sh në titan. Tomografia cone - beam pas 4 muajsh nxjerr ne pah në 80% të rasteve një rigjenerim të mirë kockor që lejon futjen e implanteve të osteointegruara për të mbështetur elementët dentar.
Sharon Aronovich DDS, kirurg maksilo - facial dhe anëtar i ekipit të studimit përfundon duke thënë se falë përdorimit të qelizave staminale, jemi gjithnjë e më afër opsioneve terapeutike minimalisht invazive për trajtimin e humbjeve të mëdha post-traumatike të kockës.

Nën kujdesin e: Daviss Cussotto, stomatolog

Përktheu: Valbona Spahia