Projektligji mbi kontributet, Prof.Asc. Dorjan Hysi: Do të çonte drejt falimentimit një pjesë të tregut stomatologjik. Dr.Nikollë Deda: USSH nuk ka karakter sindikal

Këshilli Rajonal Tiranë i USSH i kërkon Dr.Dedës të ndërhyjë urgjentisht

Paketa fiskale 2016 ka ndezur alarmin mes stomatologëve të cilët i kanë kërkuar Urdhrit të Stomatologut dhe Shoqatës Dentare Shqiptare të ndërhyjnë në mbrojtje të interesave të tyre. Objekti i shqetësimit të tyre është ndryshimi i nenit 9 në ligjin "Për sigurimet shoqërore në Republikën e Shqipërisë", i cili përcakton se duke filluar nga viti i ardhshëm stomatologët (si pjesë e profesioneve të lira) do të paguajnë kontributet e sigurimeve shoqërore dhe shëndetësore duke u mbështetur mbi pagën maksimale, ndërkohë që deri më sot llogaritej e bazuar në pagën minimale. Në relacionin e Këshillit të Ministrave ky ndryshim motivohet me pretendimin se buxhetit të shtetit do t'i shtohen rreth 1.1 miliardë lekë, por nuk merret në konsideratë impakti i rëndë që i shkaktohet tregut stomatologjik dhe popullatës nga një nismë e tillë.

SHDSH mbledh kryesinë

Qëkur lajmi u publikua në media 5 ditë më parë shqetësimi i profesionistëve të shëndetësisë është reflektuar në faqet sociale të institucioneve si Shoqata Dentare Shqiptare dhe Urdhri i Stomatologut. Ndërsa USSH ka mbajtur një qëndrim abstenues, SHDSH organizoi dje në mesditë mbledhjen me kryesinë e saj ku morën pjesë profesorë dhe kolegë me eksperiece, në përfundim të së cilës formuluan kërkesën për mosmiratimin e këtij projektligji, duke ua drejtuar atë Kuvendit të Shqipërisë, Ministrisë së Shëndetësisë, Ministrisë së Financave dhe instancave të tjera vendimmarrëse. Z. Dorjan Hysi, kreu i SHDSH-së, në një prononcim për Dentist33 thotë se "projektligji i propozuar nuk merr në konsideratë ndryshimet që ekzistojnë në sektorin stomatologjik kur vjen fjala për përvojën e kualifikimin e stomatologëve, si edhe mundësitë ekonomike dhe investimet e klinikave dentare. Në rast se projektligji kthehet në ligj, klinikat që kanë shumë të punësuar do te shkurtojnë stafin e tyre, ndërsa pjesa më e madhe e kabineteve të vogla me nga një të punësuar do të shkojnë drejt falimentimit. Nuk duhet te harrojme se rreth 95% e shërbimit dentar në Shqipëri ofrohet nga kabinetet dentare. Sipas të dhënave që kemi, mjekët stomatologë të vetëpunësuar në kabinete dentare në Tiranë dhe bashki të tjera në perfundim të muajit, pas zbritjes së shpenzimeve (qera, materiale, pagesa administrative etj) nuk arrijnë kurrë të ardhurat e një rroge maksimale. Kjo për faktin se materialet që përdorin i blejnë në vendet perëndimore, ndërsa shërbimin e ofrojnë me një çmim që i përshtatet mundësive të pacientëve vendas, pra shumë më të ulët. Pa përmendur edhe shpenzimet e tjera si p.sh. ndjekjen e aktiviteteve të edukimit në vazhdim brenda dhe jashte vendit si kusht i domosdoshëm për të ushtruar profesionin. Në kushte të tilla, ndryshimi i normës së kontributeve bazuar në pagën maksimale e rëndon edhe më tej bilancin ekonomik të këtij sherbimi. Nëse një gjë e tillë mund të bëhet duhet të aplikohet për drejtuesit teknikë të klinikave me shumë kabinete, por jo për të vetëpunësuarit me orar të plotë apo të reduktuar ose mjekët e punësuar me kontratë".
Në letrën dërguar institucioneve të sipërpërmendura (kliko këtu), SHDSH e ka konsideruar ndryshimin legjislativ për sigurimet shoqërore si joeficient, të paargumentuar dhe të pambështetur në ligj. Pasojat që do të sillte miratimi i një nisme të tillë, sipas saj janë këto:
* Shtesa e pagesës për kontributet, do të sillte përkeqësim akoma më të madh të gjendjes dhe mbylljen e një numri te konsiderueshëm kabinetesh dentare.
* Është e pritshme që do të ulet cilësia e shërbimit stomatologjik, pasi kabinetet duke dashur te ulin shpenzimet do të tentojnë të blejnë materiale më të lira e jo cilësore
*Është e pritshme që do të shkurtohen vende pune, pasi për të ulur shpenzimet do të hiqen punonjës. Kjo do te ishte një dëm i madh për të ardhmen afatgjatë të shërbimit dhe për mjekët e rinj që jo të gjithë e kanë mundësinë që të hapin aktivitetet e tyre
* Është e pritshme që do të ketë edhe rritje te menjëhershme të çmimeve për shërbimin stomatologjik për të përballuar këtë rritje të re të shpenzimeve. Duke e trajtuar shërbimin stomatologjik thjesht si biznes projekt-ligji nuk merr parasysh impaktin e rëndë social dhe shëndetësor ndaj popullatës nga një ndryshim i tillë.

Përplasje qëndrimesh në Urdhrin e Stomatologut

Kreu i Urdhrit të Stomatologut, z.Nikollë Deda, i pyetur nga Dentist33 nëse organi që përfaqëson ka marrë ndonjë vendim lidhur me ndryshimin e propozuar në paketën fiskale 2016, u shpreh se "Urdhri i Stomatologut nuk ka karakter sindikal dhe prandaj vetëm nëse do t'i kërkohet nga instancat përkatëse vendimmarrëse, do të ndërhyjnë duke mbledhur forumet drejtuese dhe asamblenë për të marrë një vendim kolegjial". Gjithashtu ai nënvizoi se USSH është jashtë çdo influence politike, por me reformat e ndryshme që prekin stomatologët dhe ndjeshmërinë e tyre merret Shoqata Dentare Shqiptare.
Nga ana tjetër, Urdhri i Stomatologut i qarkut Tiranë duket se nuk ndan të njëjtin opinion me Dr.Dedën. Në një komunikatë të përbashkët, Këshilli Rajonal Tiranë i USSH i ka kërkuar "presidentit të përgjithshëm, të hyjë urgjentisht ne kontakt me ministritë respektive (Ministrinë e Shëndetësisë dhe Ministrinë e Financave) për të mbrojtur të drejtat e stomatologëve".
Një tjetër shqetësim i ngritur nga stomatologët është edhe kuota vjetore që duhet të paguajnë pranë USSH, e cila nga 2400 lekë është rritur në 12.000 në vit. "Për vendosjen e kuotizacioneve Këshilli Kombëtar i USSH mori një vendim të përbashkët duke u bazuar edhe në kuotat që paguajnë farmacistët dhe avokatët, ata derdhin të njëjtën tarifë pranë enteve të tyre. USSH është enti që rregullon aktivitetin e më shumë se 3000 stomatologëve në vend dhe një kuotë e tillë është e domosdoshme për mbijetesën Urdhrit si strukturë", shprehet Dr.Deda.

Përgatiti: Dorina Gjuzi