Provimi i Certifikimit në 3 dhjetor, por pjesa më e madhe e stomatologëve nuk janë regjistruar në të

Stomatologët që nuk përmbushën kriteret e programit të kreditimit 2009-2014, do t'i nënshtrohen Provimit të Certifikimit më 3 dhjetor 2015, në orën 09:00. Janë më shumë se 400 stomatologë të cilët nuk i kanë përmbushur kreditet dhe kishin afat deri në 30 tetor për t'u regjistruar për këtë provim. Por, sipas Qendrës Kombëtare të Edukimit në Vazhdim rezulton se vetëm 50 prej tyre janë regjistruar për të kryer provimin pranë Fakultetit të Mjekësisë Dentare. Nëse pjesa tjetër e stomatologëve ngel jashtë provimit atëherë atyre iu pezullohet leja e ushtrimit të profesionit deri në provimin e radhës. Të paktën këtë penalitet parashikon ligji "Për kujdesin shëndetësor në Republikën e Shqipërisë".

QKEV saktëson edhe tre kushtet që duhet të plotësojnë pjesëmarrësit të cilët janë regjistruar në provim:
"1.Të jenë të pajisur me dokument identiteti (kartë identiteti ose pasaportë), si dhe me një fotokopje të saj:
2. Të kenë faturën e pagesës për provimin e certifikimit; kliko DOC111815.pdf
3. Të paraqiten së paku 30 minuta përpara fillimit të provimit".

Ndonëse ishte parashikuar të jepej në muajin tetor, stomatologët e pacertifikuar kanë pasur dy muaj më shumë në dispozicion për t'u konsultuar me programin orientues të provimit, të cilin mund ta gjeni këtu.
Në bazë të rregullores, provimi do të konsiderohet i dhënë me sukses vetëm nëse profesionisti merr të paktën 50% nga pikët maksimale. Në rast se nuk është i kënaqur me pikët e marra në provim, ai mund të paraqesë ankesën me shkrim pranë AKP-së në 5 ditët e para pas shpalljes së rezultatit. AKP nga ana e saj, pasi ka shqyrtuar kërkesën është e detyruar që brenda 30 ditëve t'i kthejë profesionistit një përgjigje të argumentuar. Megjithatë për ndryshimin e rezultatit do të duhet një vendim nga Komisioni i Provimit të Ricertifikimit.
Kalimi me sukses i provimit të certifikimit është kushti bazë për profesionistët që të vazhdojnë të ushtrojnë profesionin.