Kodi i Etikës i Urdhrit të Stomatologut: Penalizim sipas ligjit për të gjitha klinikat që aplikojnë reklamimin e çmimeve

Urdhri i Stomatologut ka tashmë portalin e tij online, të cilin të gjithë stomatologët dhe ndihmës-stomatologët, duhet ta kenë si pikë referimi për t’u informuar mbi të gjitha praktikat që duhet të ndjekin për ushtrimin e profesionit të tyre. Në të USSH ka publikuar dokumentin me të cilin duhet të p

Urdhri i Stomatologut ka tashmë portalin e tij online, të cilin të gjithë stomatologët dhe ndihmës-stomatologët, duhet ta kenë si pikë referimi për t'u informuar mbi të gjitha praktikat që duhet të ndjekin për ushtrimin e profesionit të tyre. Në të USSH ka publikuar dokumentin me të cilin duhet të pajisen të gjithë këta profesionistë për hyrjen në provimin e licencimit, kryerjen e stazhit tre mujor, si dhe për licencimin e rilicencimin e tyre (klikoni këtu). E po ashtu janë njoftuar të gjithë stomatologët dhe ndihmës-stomatologët se dosjet e tyre tashmë janë transferuar në zyrat e USSH, kështu që nuk do të njihet asnjë lloj dokumentacioni që merret pranë Urdhrit të Mjekëve.

Një njoftim tjetër i rëndësishëm ka të bëjë me kuotat e anëtarësisë. Është vendosur se deri në maj të 2015-ës detyrimi i anëtarëve të USSH-së do të jetë 200 lekë të reja në muaj dhe pas këtij muaji kuota e anëtarësisë është 1000 lekë të reja në muaj.
Dokumenti më i rëndësishëm i botuar në faqen zyrtare të Urdhrit është "Kodi i Etikës dhe i Deontologjisë Stomatologjike", një lloj 'kushtetute' me nenet përkatëse që rregullojnë profesionin e stomatologëve e ndihmës-stomatologëve në vend. Një ndër to, "Mjekësia si biznes, publiciteti, ortakëritë", parashikon se: "mjekut stomatolog nuk i lejohet të hyjë në ortakëri me farmacistë, stafet ndihmuese, apo persona të tjerë për qëllime fitimprurëse të paligjshme. Nuk i lejohet të praktikojë stomatologjinë si biznes. Ai e ka kategorikisht të ndaluar të bëjë vizita, apo konsultime në lokale e mjedise tregtare, ku tregtohen medikamente, produkte, aparatura, a pajisje të tjera mjekësore. E ka kategorikisht të ndaluar reklamimin, publicitetin e çfarëdo lloji për arsye përfitimi. E ka kategorikisht të ndaluar reklamimin, publicitetin e çmimeve në media elektronike, atë të shkruar, vizive, televizive dhe radiofonike për arsye përfitimi. E ka kategorikisht të ndaluar publikimin e çmimeve jashtë ambienteve ku kryen shërbimin". Dhe në rast shkeljeje të këtyre pikave, mjekët stomatologë do të penalizohen sipas ligjeve në fuqi. E njëjta gjë vlen edhe për abuzimin në përshkrimin dhe lëshimin e dokumenteve mjekësore, të cilat bëhen objekt i gjykimit profesional dhe juridik.

Aplikimi i metodave të reja diagnostikuese, mjekuese dhe parandaluese rregullohet me nenin 54, sipas të cilit këto metoda lejohen vetëm pas shqyrtimit klinik nga një komision i posaçëm, i pavarur dhe kompetent. Adoptimi, kryerja dhe nxitja e metodave të pavërtetuara shkencërisht është e ndaluar, konsiderohet kundërvajtje me aktet ligjore. "Vetëm një mjekim i krahasuar me placebo, mund të lejohet në kushtet kur sipas të dhënave shkencore, i sëmuri mund të përfitojë, por duke e garantuar se efektet e dëmshme janë të përjashtuara në mënyrë të sigurt", saktësohet në këtë nen.
Gjithashtu "në rast se mjeku stomatolog vihet në dijeni të një sjelljeje të kolegu që nuk përputhet me normat e etikës mjekësore stomatologjike, ai e ka për detyrë t'ia vërë në dukje këtë vetëm kolegut të tij dhe Urdhrit të Stomatologut. Por, atij nuk i lejohet të diskutojë për këtë me të sëmurët, me familjarët, apo me kolegë dhe persona të tjerë".

Në fund, në nenin 63 parashikohet se çdo bashkim mjekësh stomatologë duhet të jetë në bazë të një kontrate, e cila i komunikohet paraprakisht Këshillit Rajonal të Urdhrit të Stomatologëve, që verifikon nëse është ose jo në përputhje me ligjet dhe me Kodin e Etikës dhe Deontologjisë. Si dhe çdo marrëveshje ose kontratë grupimi me qëllim profesional ndërmjet stomatologë dhe punonjësve të tjerë si infermierë, kimistë, etj. i dërgohet Këshillit Rajonal të Urdhrit të Stomatologëve.

Klikoni këtu për të lexuar të plotë "Kodin e Etikës dhe Deontologjisë Stomatologjike".