Provimi i ricertifikimit në muajin tetor, ja ç'duhet të dini

Stomatologët që nuk kanë plotësuar numrin e krediteve apo nuk kanë marrë pjesë në Programin e Edukimit në Vazhdim do të japin provimin e ricertifikimit në muajin tetor, njësoj si mjekët dhe farmacistët. Megjithatë datat e zhvillimit të tij nuk janë përcaktuar ende nga Agjencia Kombëtare e Provimeve.

Stomatologët që nuk kanë plotësuar numrin e krediteve apo nuk kanë marrë pjesë në Programin e Edukimit në Vazhdim do të japin provimin e ricertifikimit në muajin tetor, njësoj si mjekët dhe farmacistët. Megjithatë datat e zhvillimit të tij nuk janë përcaktuar ende nga Agjencia Kombëtare e Provimeve.

"Ashtu siç ishte parashikuar provimi do të zhvillohet në muajin tetor dhe do të bazohet në programet orientuese që janë publikuar më herët", është shprehur Entela Shehu, drejtoreshë e Qendrës Kombëtare të edukimit në Vazhdim. Ndërkohë Ministria e Shëndetësisë ka konfirmuar se profesionistët që nuk e kalojnë provimin e ricertifikimit do t'iu pezullohet licenca.
"Provimi i ricertifikimit kryhet për të vlerësuar nivelin e njohurive dhe kompetencave të profesionistëve që nuk janë angazhuar plotësisht në edukimin e tyre në vazhdim gjatë një cikli ricertifikimi dhe për të garantuar përputhjen me kërkesat bashkëkohore të praktikës profesionale. Pas përfundimit me sukses pjesëmarrësit në provim i jepet dëshmia përkatëse, e cila dorëzohet pranë Urdhrit Profesional", shkruhet në rregulloren e publikuar nga QKEV.

Për regjistrimin në provim, profesionistët duhet të paraqesin pranë AKP-së një kërkesë me shkrim, bashkëngjitur së cilës duhet të kenë edhe një fotokopje të kartës së identitetit, të lejes së ushtrimit të profesionit dhe faturën e pagesës së provimit. Provimi do të konsiderohet i dhënë me sukses vetëm nëse profesionisti merr të paktën 50% të pikëve maksimale. Në rast se nuk është i kënaqur me pikët e marra në provim, ai mund të paraqesë ankimimin me shkrim pranë AKP-së 5 ditët e para nga shpallja e rezultatit.
Sipas QKEV-së përjashtohen nga detyrimi i provimit të gjithë ata që e kanë marrë lejen e ushtrimit të profesionit pas datës 1 janar 2012, si dhe të punësuarit në shërbimin publik që ju mbeten edhe 2 vjet ose më pak kohë për të mbushur moshën e pensionit.

Profesionisti pjesëmarrës në provimin e ricertifikimit ka të drejtë të përsërisë një herë provimin brenda 6 mujave pas dhënies në herën e parë dhe në një kohë të dytë jo më shumë se 5 herë. Profesionisti pjesëmarrës në provim ka të drejtë të verifikojë përgjigjet e dhëna dhe të kontestojë rezultatin me një ankesë me shkrim pranë AKP-së brenda 5 ditëve nga shpallja e rezultatit", thuhet në rregullore. Kjo është hera e parë që do të zhvillohet provimi i ricertifikimit për bluzat e bardha.

Në Download Center gjeni programin orientues për provimin e stomatologëve.