Përfshirja në Regjistrin Kombëtar të USSH, detyrim për stomatologët që të vazhdojnë të ushtrojnë profesionin

Rreth një javë më parë kreu i USSH-së, dr.Nikoll Deda, na pohoi se Urdhri po punon për realizimin e Regjistrit Kombëtar të Stomatologëve, i cili do të jetë i disponueshëm si në format elektronik ashtu edhe në letër.

Rreth një javë më parë kreu i USSH-së, dr.Nikoll Deda, pohoi për Dentist33.al se Urdhri po punon për realizimin e Regjistrit Kombëtar të Stomatologëve, i cili do të jetë i disponueshëm si në format elektronik ashtu edhe në letër. "Në Regjistrin Kombëtar do të figurojnë të gjithë stomatologët që ushtrojnë profesionin në Shqipëri, vendas apo të huaj qofshin, si dhe të gjithë stomatologët që aktualisht rezultojnë të paregjistruar. Për hartimin e tij jemi mbështetur në dosjet e marra nga Urdhri i Mjekut, janë rreth 3000 të tilla që do të kalojnë përmes një procesi verifikimi", u shpreh kreu i USSH-së.
Pra, që stomatologët të vazhdojnë të gëzojnë të drejtën e ushtrimit të profesionit duhet të jenë domosdoshëmrisht pjesë e këtij regjistri dhe të kenë të qartë procedurën që duhet të ndjekin për këtë qëllim. Ata që kanë një leje të vlefshme ushtrimit të profesionit kalojnë automatikisht në këtë regjistër, por nuk ndodh e njëjta gjë me stomatologët e sapodiplomuar, atyre që iu ka skaduar licenca, apo që nuk kanë qenë të regjistruar as në Urdhrin e Mjekut para krijimit të USSH-së. Të tre këto kategori, së pari duhet të përfshihen në regjistrin rajonal të stomatologëve dhe më pas duhet të paraqiten në zyrat qendrore të USSH-së (në rrugën "Artan Hoxha", pranë Zogut të Zi) për të bërë regjistrimin në atë kombëtar. Aktualisht Urdhri është i pozicionuar në 7 rajone: Tiranë, Durrës, Shkodër, Elbasan, Fier, Vlorë, Lezhë.
Në momentin e regjistrimit, stomatologët duhet të kenë me vete diplomën e noterizuar dhe për ata që kanë studiuar jashtë Shqipërisë diploma duhet të jetë e njehsuar nga Ministria e Arsimit dhe Sportit. Të sapodiplomuarit gjithashtu duhet të kryejnë praktikën 3-mujore pranë klinikave të licencuara dhe në fund për t'u pajisur me licencë do të duhet të japin edhe një provim.
"Ne si ent përfaqësues i këtyre profesionistëve synojmë të stimulojmë standardin në një treg që deri më sot ka funksionuar pa rregulla. Po ashtu, realizimi i një kodi etik i formuluar nga elita e profesoratit dhe përfaqësues të klinikave më të mira dentare do të na ndihmojë në misionin tonë", shton dr.Deda.
Ndërkaq, tarifa që duhet të paguajë një stomatolog për USSH-në është 1000 lekë të reja në muaj, shumë e cila mund të paguhet edhe një herë në vit me një limit kohe deri në muajin mars të vitit të ardhshëm. Në këtë vit të parë, Urdhri i Stomatologut financohet nga Ministria e Shëndetësisë.