USSH: Ja masat për stomatologët me kredite të paplotësuara. Ngrihet Regjistri Kombëtar i Stomatologëve

Stomatologët me më pak se 100 kredite do t’i nënshtrohen Provimit të Ricertifikimit deri në muajin dhjetor, por ndërkohë USSH në përputhje me rregulloren e Ministrisë së Shëndetësisë, ka dërguar shkresën me emrat e tyre pranë Inspektoratit Shtetëror Shëndetësor për pezullimin e licencës

Dorina Gjuzi

Pas reagimit të Ministrisë së Shëndetësisë ndaj deklaratës së kreut të UMSH-së që nënvizonte ashpërsinë e sanksioneve për mjekët me zero kredite dhe konkretisht largimin e tyre nga puna, Dentist33.al u interesua pranë Urdhrit të Stomatologut për qëndrimin që mban ky ent në lidhje me dentistët me zero kredite dhe ata që nuk kanë përmbushur kuotën e detyrueshme prej 100 kreditesh.

"Ka rreth 1 muaj e gjysmë që Urdhri i Stomatologut ka filluar me procesin e licencimit për të gjithë stomatologët dhe ndihmës-stomatologët që kanë kaluar pragun e nevojshëm të ricertifikimit prej 100 kreditesh. Për stomatologët që kanë grumbulluar një numër të caktuar por jo më shumë se 100 kredite, si dhe për ata me zero të tilla Urdhri i Stomatologut ka dërguar shkresën për pezullimin e licencës pranë Inspektoratit Shtetëror Shëndetësor. Megjithatë, të gjithë këta profesionistë, rreth 700 në numër, do të marrin pjesë në Provimin e Ricertifikimit i parashikuar për t'u zhvilluar deri në dhjetor të këtij viti, ku do t'u jepet mundësia të provojnë njohuritë e tyre dhe të vazhdojnë të ushtrojnë profesionin", shprehet për Dentist33.al kreu i USSH, Dr. Nikoll Deda.
Por ende nuk është e qartë se çfarë do t'i penalizojë më shumë stomatologët me 0 kredite në krahasim me ata që kanë arritur të mbledhin një numër të pamjaftueshëm kreditesh.

Ndërkaq i pyetur për vijimësinë e punës brenda Urdhrit, Dr. Deda thotë se është duke u krijuar Regjistri Kombëtar i Stomatologëve i cili do të jetë i disponueshëm si në format elektronik ashtu edhe në atë të zakonshëm, në letër. "Kemi filluar punën me Regjistrin Kombëtar të Stomatologëve, ku do të figurojnë të gjithë stomatologët e Shqipërisë, duke përfshirë edhe ata që rezultojnë të paregjistruar sot. Për hartimin e tij jemi mbështetur në dosjet e marra nga Urdhri i Mjekut dhe jemi në vijimësi të procesit", përfundon kreu i USSH-së.