Urdhri i Stomatologut: Shkeljet e distributorëve dhe klinikave private, ja masat që do të marrim

Me të nisur nga puna Urdhri i Stomatologut, planifikon të ngrejë një ekip inspektimi dhe do të kontaktojë me të gjithë distributorët për të kontrolluar se çfarë materialesh hyjnë në vend, nëse janë të certifikuara dhe për ato pa faturë do të ketë penalizime.

Dorina Gjuzi

Që nga fillimi i 2015-ës puna për krijimin e strukturave të Urdhrit të Stomatologut ka qenë e shpejtë. U përmbyllën fazat kryesore si: formimi i këshillave rajonalë, ngritja e Këshillit Kombëtar me 25 anëtarë dhe zgjedhja e Presidentit të Urdhrit, Dr. Nikollë Deda. Kreu i USSH-së shprehet entuziast për punën që e pret Urdhrin. "Deviza jonë si ent përfaqësues i këtyre profesionistëve është ngritja dhe stimulimi i standardit në një treg që deri më sot ka funksionuar pa rregulla. Jo vetëm do të mbrojmë interesat e stomatologëve, por do të rregullojmë raportet e konkurrencës ndërmjet klinikave në të mirë të shërbimit stomatologjik në vend. Realizimi i një kodi etik i cili bazën e ka në kodin e etikës së mjekëve, por i përshtatur për stomatologët dhe i formuluar nga elita e profesoratit dhe përfaqësues të klinikave më të mira dentare do të na ndihmojë në misionin tonë", shprehet z.Deda për Dentist33.al.
Por pavarësisht entuziazmit, situata në stomatologjinë në vend nuk është ndër më të mirat. Për kreun e USSH-së ky treg është i mbingopur me dentistë të rinj dhe konkurrenca e pandershme ka rënë në kurriz të cilësisë së shërbimit, kryefjalë e shqetësimit të pacientëve: "Rreth 30% e shërbimit stomatologjik, i vendosur kryesisht në qytetet e mëdha është i mirëkualifikuar, por nuk mund të them të njëjtën gjë për pjesën tjetër. Mendoj se aktualisht Stomatologjia shqiptare është në krizë për shkak të mbipopullimit të tregut me prurje të reja, numër i cili duhet kufizuar. Që nga viti '93 nuk kemi rritje të çmimeve për shkak edhe të rritjes së konkurrencës së pandershme. Nuk ka pasur asnjëherë një njësi kontrolli dhe nuk është trajtuar as çështja e materialeve dhe as ajo e çmimeve".
Me të nisur nga puna Urdhri i Stomatologut, planifikon të ngrejë një ekip inspektimi dhe do të kontaktojë me të gjithë distributorët për të kontrolluar se çfarë materialesh hyjnë në vend, nëse janë të certifikuara dhe për ato pa faturë do të ketë penalizime. "Megjithatë, Urdhri nuk është projektuar si një organ për kontrollin e klinikave në terren sepse nuk e kemi dhe strukturën të tillë. Me këtë do vazhdojë të merret Inspektorati i Shëndetit i cili do të marrë parasysh kërkesat tona për raste specifike të sinjalizuara. Gjithashtu do të kërkojmë që të mos ketë reklama me çmime dhe nga ana tjetër do ngremë një komision që të inspektojë rastet kur vihen çmime shërbimi poshtë kostos reale të tyre për të verifikuar nëse këtë gjë klinikat e bëjnë në kurriz të cilësisë", përfundon z.Deda. Sipas ligjit, rastet e shkeljeve mund të gjobiten nga 1000 lekë të reja deri në heqje licence për 6 vjet.