ADA: Stomatologët amerikanë plotësisht kompetentë për administrimin e vaksinave

Shoqata Dentare Amerikane ka mbështetur plotësisht kompetencën e stomatologëve amerikanë që janë ofruar për të administruar vaksinat

Cristoforo Zervos

ADA ka ofruar mbështetjen e saj për të gjithë stomatologët amerikanë që në këto javë kanë ofruar kompetencat e tyre profesionale në praktikë për të administruar vaksinat, veçanërisht, kur të jetë gati vaksina kundër Sars Cov-2. Mbështetja e ADA-s është zyrtarizuar disa ditë më parë nga House of delegates e shoqatës që pohon se stomatologët amerikanë kanë të gjitha kompetencat e nevojshme për të administruar vaksinat shpëtimtare.

ADA afirmon se stomatologët janë tashmë të gatshëm dhe kanë të gjitha kompetencat dhe profesionalitetin e nevojshëm për të administruar vaksinat, që mbrojnë jo vetëm jetën dhe shëndetin e pacientëve, por edhe të vetë stomatologëve dhe stafit të klinikës qoftë në ato private apo shtetërore.
"Pandemia ka evidentuar përfitimet e mundshme që kompetencat e stomatologëve mund të sjellin në ndihmë të shëndetësisë preventive, duke përfshirë administrimin e vaksinimeve," - ka afirmuar Duc M. Ho, president i ADA Council on Dental Practice.
"Siç ka ndodhur me farmacistët (të cilët në SHBA kanë të drejtën e zgjedhjes së administrimit të vaksinave kundra gripit)," - ka shtuar Dr. Ho - "amplifikimi i vaksinave edhe në klinikat dentare do të shtonte numrin e qytetarëve që kanë akses ndaj kurave dhe nivelin e parandalimit dhe të shëndetit të përgjithshëm në vend."

ADA thekson se kërkesa për shtrirjen e vaksinave edhe te stomaologët vjen edhe nga njohuritë e tyre klinike dhe nga eksperienca e grumbulluar në praktikën e punës. Për shembull, stomatologët kanë tashmë formimin e duhur për të administruar injeksionet anestetike intra dhe ekstra orale, si edhe kur kanë lejet e nevojshme edhe praktikat e sedacionit. Këto "aftësi", duke i shtuar edhe formimin e përshtatshëm, për ADA-n mund të përkthehen lehtësisht në praktikën e administrimit të vaksinave.
Interesant është fakti që edhe në Evropë dhe në pjesën tjetër të botës po diskutohet lejimi i stomatologëve për të administruar vaksinat.

Në Spanjë, për shembull, duke parë situatën dramatike në të cilën është vendi për shkak të pandemisë nga Covid-19, stomatologët prej kohësh kanë kërkuar që të përfshihen në praktikën e testimeve dhe në administrimin e vaksinave për popullsinë për t'i dhënë një dorë shërbimit shëndetësor shtetëror spanjoll.
Një shembull tjetër është ai i qeverisë së Britanisë së Madhe, që në këto javë po diskuton një projektim të ligjit që do të amplifikonte te profesionistët e shëndetit, përfshirë edhe stomatologët, mundësinë për të administruar vaksinat në popullsi, ndër të cilat edhe atë të Koronavirusit të ri. Javët e fundit kjo temë është në diskutim edhe në Itali.

Dhe ditët e fundit është dhënë edhe konfirmimi i pa zyrtarizuar ende nga Ministri i Shëndetësisë Roberto Speranza që edhe farmacistët të mund të kryejnë testimet e shpejta dhe administrimin e vaksinave anti Covid-19 për të lehtësuar dhe ndihmuar shërbimin shëndetësor.

Përktheu: Valbona Spahia