COVID-19: prevalenca ndërmjet dentistëve spanjollë është më e ulët në krahasim me popullsinë e përgjithshme

Edhe në Spanjë protokollet e përshtatura nga dentistët për parandalimin e infeksionit duket se kanë funksionuar. Nga një hetim i kryer nga Consejo General de Dentistas shumë pak dentistë kanë rezultuar pozitivë

Consejo General de Dentistas në Spanjë ka kryer një hetim mbi më shumë se 2.200 dentistë në të gjithë Spanjën me objektivin e njohjes së situatës profesionale dhe prevalencës së COVID-19 të këtij grupi profesional në periudhën nga mesi i muajit maj deri në shtator.

Ndërmjet rezultateve të para të studimit, të kryer nga data 1 deri më 14 shtator, rezulton se 9 klinika nga 10 e kanë rifilluar plotësisht aktivitetin e tyre, 7% ka vendosur të mos kryejë ende procedurat që sjellin gjenerimin e aerosolit dhe 1% vijon të punojë vetëm me rastet e emergjencës.
Nga pikëpamja e punës, 27% e të intervistuarve duhet t'i drejtohej instrumentit të Expediente de Regulación de Empleo Temporal-ERTE dhe 0,5% ka ndërprerë përfundimisht aktivitetin profesional.

Përsa i përket infeksioneve nga SARS-CoV-2, nga 2.200 dentistë që kanë marrë pjesë në hetim 741 (33,5%) kanë kryer një PCR. Nga këta, 30 raste kanë rezultuar pozitivë (4%) dhe vetëm te 12 dyshimi për infektimin ka qenë i lidhur me vendin e punës (1,6%).
Në fund, 93% e të intervistuarve pohon se kanë aderuar plotësisht te rekomandimet zyrtare të Organización Colegial.

Presidenti i Consiglio Generale dei Dentisti, doktor Óscar Castro Reino, nënvizon edhe njëherë përgjegjësinë e madhe që po tregojnë dentistët spanjollë, duke u kujdesur për pacientët e tyre dhe duke përshtatur në maksimum masat parandaluese të rekomanduara. Kjo sjellje serioze dhe e kujdesshme po lejon që të minimizohen risqet në vendin e punës, siç tregohet edhe nga të dhënat e infektimeve shumë të ulëta, pavarësisht se profesioni i dentistëve është konsideruar në risk të lartë për të përcjellë infeksionin.

Përktheu: Valbona Spahia