Përdorimi i maskës mund të reduktojë shkallën e rëndë të infektimit nga COVID

Përdorimi i maskave ndërkohë që jemi në pritje të një vaksine mund të bëhet një nga shtyllat për kontrollin e pandemisë nga COVID-19 dhe një ndihmesë në reduktimin e ashpërsisë së sëmundjes, duke garantuar që një përqindje gjithnjë e më e madhe e infeksioneve të reja të jetë asimptomatike. Ky ka qenë rezultati i një artikulli të publikuar së fundmi në The New England Journal of Medicine, të firmosur nga disa docentë dhe kërkues të Universitetit të San Francisco (Ucsf), që kanë grumbulluar raste të ndryshme dhe evidenca faktike. Nëse kjo hipotezë do të konfirmohej përdorimi i kësaj mase mbrojtëse mund të bëhet një formë "variolizimi"që do të gjeneronte imunitet dhe do të ngadalësonte përhapjen e virusit, siç shpjegojnë autorët.

Marrëdhënia e ngushtë ndërmjet përdorimit të maskës dhe kontrollit të një pandemie
Një nga evidencat e para, pohohet në artikullin e publikuar nga dy kërkuesit, është marrë në muajin mars kur kanë filluar të qarkullojnë raportet e dokumentuara mbi normat e larta të përhapjes virale të Sars-CoV-2 me anë të rrugëve nazale dhe orale nga ana e pacientëve pre-simptomatikë ose asimptomatikë. Maskat, që përdoren gjerësisht nga popullsia, duket se janë një nga mënyrat e mundshme për të parandaluar transmetimin nga personat e infektuar asimptomatikë. Në prill, Centers for Disease Control and Prevention (Cdc) në Amerikë kanë rekomanduar pra popullsinë që të përdorin maskat kirurgjikale ose ato të qepura vetë, në zonat me norma të larta të transmetimit të infeksionit. Rastet e së shkuarës që lidhen me viruset e tjera respiratore, të cilat janë përmendur nga artikulli, indikojnë që përdorimi i maskës mund të mbrojë personin që e përdor. Në fakt, hetimet epidemiologjike të kryera në të gjithë botën, veçanërisht në vendet aziatike që janë mësuar me përdorimin e kësaj mase mbrojtëse gjatë pandemisë nga Sars në vitin 2003, kanë sugjeruar që ekziston një lidhje e fortë ndërmjet përdorimit të maskës dhe kontrollit të një pandemie të mundshme. Të dhëna të tjera të fundit që vijnë nga qyteti i Boston tregojnë se infeksionet nga Sars-CoV-2 janë zvogëluar ndërmjet profesionistëve shëndetësorë pas përdorimit të maskës nëpër spitale që nga fundi i muajit mars.

Të dhëna të fundit virologjike, epidemiologjike dhe ekologjike kanë çuar në hipotezën se përdorimi i maskës mund të reduktojë gjendjen e rëndë të sëmundjes ndërmjet personave që infektohen. Kjo mundësi është koherente me një teori të vjetër që është dhënë për patogjenezën virale, sipas së cilës shkalla e rëndë e sëmundjes është në proporcion me inokulimin viral që është marrë. Me infeksionet virale ku përgjigjet imunitare të bartësit luajnë një rol mbizotërues në patogjenezën virale, si Sars-CoV-2, doza të larta inokulimi viral mund të mbingarkojnë dhe çrregullojnë mbrojtjet imunitare duke shtuar ashpërsinë e sëmundjes. Nëse inokulimi viral është i rëndësishëm në përcaktimin e ashpërsisë së infeksionit Sars-CoV-2, një motiv tjetër i fundit i supozuar për përdorimin e maskave do të ishte ai i reduktimit të ngarkesës virale të mbajtësit dhe si pasojë edhe të impaktit klinik të sëmundjes. Pra, një përdorim i gjerë i maskave mund të kontribuojë në shtimin e përqindjes së infeksioneve asimptomatike. Cdc kanë vlerësuar se përqindja mesatare e infeksionit asimptomatik nga Sars-CoV-2 në mes të korrikut në Shtetet e Bashkuara ishte me 40%. Por, përqindja e infeksionit asimptomatik është dokumentuar mbi 80% në ambientet me përdorim të gjerë të maskës. Vendet që kanë përshtatur përdorimin e pajisjeve mbrojtëse në nivel universal kanë përmirësuar përqindjen e rasteve të rënda të lidhura me COVID dhe si pasojë edhe një ngadalësim të vdekjeve. Një tjetër eksperiment i kryer te një lloj brejtësi sirian ka simuluar maskimin kirurgjikal të kafshëve dhe ka treguar se me maskimin e simuluar, brejtësit kishin më pak mundësi për t'u infektuar.

Rasti i kroçierës argjentinase
Kërkuesit kanë treguar edhe raste të tjera interesante në mbështetje të hipotezës: në një epidemi të përhapur në një kroçiere argjentinase, ku pasagjerët ishin pajisur me maska kirurgjikale dhe personeli i bordit me maska N95, norma e infeksionit asimptomatik ka qenë 81% (krahasuar me 20% në vatrat e mëparshme të kroçierave që nuk kanë përdorur maska). Në dy vatra të fundit të përhapur në fabrikat e përpunimit të ushqimit në Shtetet e Bashkuara, ku të gjithë punonjësve i janë dhënë maska çdo ditë dhe i është kërkuar që t'i përdorin, përqindja e infeksioneve asimptomatike ndërmjet më shumë se 500 personave që janë infektuar ka qenë me 95%, kundër vetëm 5% të rasteve të lehta ose të moderuara. Për më tepër, normat e vdekshmërisë në vendet ku maska është e detyrueshme ose përdoret nga pothuajse e gjithë popullsia kanë qëndruar të ulëta, edhe pas rritjes së rasteve me heqjen e karantinës. Sipas autorëve për verifikimin e hipotezës se përdorimi i maskës nga ana e të gjithë popullsisë është një strategji efikase në ngadalësimin e ashpërsisë së infeksionit nga koronavirusi, janë të nevojshme studime të mëtejshme për të krahasuar normën e infeksionit asimptomatik në zonat me dhe pa përdorim universal të pajisjeve mbrojtëse. Për të testuar hipotezën e "variolizimit", janë të nevojshme më shumë studime që krahasojnë forcën dhe kohëzgjatjen e imunitetit të limfociteve T, specifike për Sars-CoV-2, ndërmjet personave me infeksion asimptomatik dhe atyre me infeksion simptomatik, si edhe në demonstrim të ngadalësimit natyral të Covid-19 të përhapur në zonat me një përqindje të lartë infeksionesh asimptomatike. Pavarësisht se të gjithë kërkuesit dalin në përfundimin se ka prova gjithnjë e më shumë se përdorimi i maskës në nivel global mund të sjellë përfitime në luftën qoftë të reduktimit të përqindjes së transmetimit qoftë të reduktimit të ashpërsisë së sëmundjes.

Cristoforo Zervos

Përktheu: Valbona Spahia