Një shëndet i mirë oral mbron zemrën dhe përmirëson mbrojtjet kundër Covid-19

SIdP: kurimi i inflamacionit të gingivave ul faktorët kryesorë të riskut kardiovaskular deri në 30% dhe për të paktën 6 muaj por me një kontroll të mirë të pllakës bakteriale është e mundur që të sigurohet shëndeti i zemrës për një kohë shumë më të gjatë

Mbajtja e gojës e shëndetshme i bën mirë shëndetit veçanërisht atij të zemrës. Këtë fakt e ka rikujtuar Shoqëria Italiane e Periodontologjisë dhe Implantologjisë (SIdP) me rastin e Ditës Botërore të Zemrës (që përkon me datën 29 shtator), duke nënvizuar sesi parandalimi i periodontitit apo inflamacionit të rëndë gingival që prek 8 milionë italianë, redukton në mënyrë të konsiderueshme riskun për zemrën dhe enët e gjakut. Larja e dhëmbëve të paktën 2 herë në ditë ul probabilitetin e aritmive dhe insuficiencës kardiake me 10% ndërsa terapia jo kirurgjikale e periodontitit, duke reduktuar sasinë e baktereve të pranishme, zvogëlon edhe me 30% faktorët kryesorë të riskut kardiovaskular për të paktën 6 muaj.
Parandalimi i inflamacionit gingival me një higjienë të përshtatshme orale, për më tepër mund të jetë i rëndësishëm edhe për t'u mbrojtur nga COVID-19: bakteret orale përgjegjëse për periodontitin mund të agravojnë infeksionet pulmonare ose të lehtësojnë kolonizimin e rrugëve të ajrit nga ana e agjentëve infektivë si Koronavirusi.

"Këto të dhëna konfirmojnë që shëndeti i gojës jehon edhe në gjendjen e shëndetit të përgjithshëm dhe në veçanti tek ai kardiovaskular, me një lidhje të fortë ndërmjet sëmundjeve të zgavrës orale dhe patologjive sistemike që variojnë nga diabeti deri tek artridi reumatoid dhe nga hipertensioni arterial deri te sëmundja e Alzheimer. Prandaj është e rëndësishme që të shmangen faktorët e riskut, duke përshtatur stile jetese të shëndetshme dhe një higjienë të mirë orale, me vizita periodike te dentisti," - observon Luca Landi, president i SIdP, - "Larja e dhëmbëve të paktën dy herë në ditë, apo edhe tre, redukton riskun e aritmive, infarktit miokardiak dhe episodeve kardiake akute. Personat që i nënshtrohen terapisë jokirurgjikale për reduktimin e sasisë së baktereve patogjene të pranishme në xhepat periodontalë reduktojnë edhe numrin e baktereve virulente në gjak që do të kontribuonin në formimin e ateromave pra ngushtimin e arterieve. Terapia periodontale çon edhe në një reduktim të proteinës C reaktive, të fibrinogjenit dhe të kolesterolit LDL të oksiduar, elemente të tjera të përfshira në një shtim të inflamacionit të enëve të gjakut dhe të probabilitetit të shfaqjes së aterosklerozës. Të gjithë këto faktorë të riskut kardiovaskular ulen me rreth 30% për të paktën 6 muaj pas terapisë periodontale: nëse rezultati mbahet me një kontroll të mirë të pllakës bakteriale nëpërmjet seancave të higjienës periodike është e mundur që shëndeti i zemrës të jetë i sigurt për një periudhë më të gjatë."

E gjithë kjo është edhe më e rëndësishme sot, gjatë pandemisë së COVID-19: studime të ndryshme klinike kanë risjellë lidhjen ndëmjet sëmundjeve kardiovaskulare dhe COVID-19, duke treguar se pacientët me patologji kardiake të mëparshme dhe hipertension kanë më shpesh nevojë për shtrim në terapi intensive në rastin e infektimit me SARS-CoV-2, që përkeqëson patologjitë kardiovaskulare.

" Edhe gjendja e shëndetit oral mund të ketë një impakt në dekursin e COVID-19, në fakt bakteret patogjene që qëndrojnë në gojë mund të agravojnë infeksionet pulmonare ose të lehtësojnë kolonizimin e rrugëve të ajrit nga ana e baktereve dhe virusit patogjen," - shton Francesco Cairo, zëvendës president iSIdP.- "Prandaj sot më shumë se kurrë është thelbësore që të kujdesemi për shëndetin e gojës dhe zemrës bashkë: sëmundjet kardiovaskulare ndajnë me periodontitin faktorë të shumtë risku, ndaj luftimi dhe parandalimi i njërës ka efekte pozitive te tjera dhe anasjelltas. Periodontiti dhe patologjitë kardiovaskulare ndajnë edhe të njëjtët faktorë gjenetikë: në një zonë specifike në kromozomin 9 në fakt janë vënë re shprehje të shumfishta të lidhura midis tyre jo vetëm me diabetin e tipit 2 por edhe me sëmundjen e Alzheimerit. Megjithatë ajo që ka më shumë rëndësi në reduktimin e riskut të sëmundjeve gingivale dhe kardiake është një stil i përshtatshëm jetese: shumë nga elementet që konkurrojnë për të rritur riskun për zemrën dhe enët e gjakut varen nga stilet e jetesës të modifikueshme si konsumimi i alkoolit, duhanpirja, jeta sedentare, ushqyerja e gabuar, të gjithë këto janë faktorë me një impakt negativ edhe në shëndetin oral. Ja përse me rastin e Ditës Botërore të Zemrës është e rëndësishme që t'i kujtojmë të gjithëve se zgjedhjet e thjeshta ditore kontribuojnë në mënyrë vendimtare në përmirësimin e shëndetit oral dhe kardiovaskular të secilit."

Nën kujdesin e: Zyra e Shtypit të SIdP

Përktheu: Valbona Spahia