Federata Evropiane e Peridontologjisë: Ndërprerja e trajtimit stomatologjik mund të dëmtojë seriozisht shëndetin

Federata Evropiane e Periodontologjisë ka lancuar fushatën “Kthim në normalitet”, për të promovuar shëndetin oral edhe në epokën e Covid-19. Graziani: Nuk është provuar se ka risqe për ata që i drejtohen klinikës dentare

Lorena Origo

Muajt e fundit, shumë pacientë stomatologjikë në të gjithë botën janë ndeshur me ndërprerjen e papritur të trajtimeve të tyre për shkak të pandemisë nga Covid-19 (SARS-CoV-2). Profesionistët e shëndetit oral kanë implemetuar protokolle të reja dhe rekomandime për të shtyrë trajtimet që nuk janë urgjente, të cilat kanë shkaktuar vonesa të konsiderueshme në kurat stomatologjike dhe në planet e trajtimit dentar.
Për t'i dhënë sektorit dentar një guidë sesi mund të përballojnë me efikasitet krizën nga Covid-19, Federata Evropiane e Periodontologjisë (FEP) ka nxjerrë rekomandime që përfshijnë një protokoll sigurie për klinikat dentare, që duhet ndjekur gjatë trajtimit të pacientëve përpara, gjatë dhe pas ardhjes në klinikë.

Masa të ngjashme janë propozuar dhe përshtatur në të gjithë botën nga organizata të tjera dentare kombëtare dhe ndërkombëtare e duket se kanë qenë efikase në kufizimin e përhapjes virale në fushën stomatologjike. Qoftë OBSH-ja qoftë Centers for Disease Control (CDC) afirmojnë se nuk ka pasur raste të konfirmuara me Covid-19 që janë infektuar në një klinikë dentare.
"Shëndeti oral është një komponent i mirëqenies së përgjithshme dhe ne të gjithë duhet të vazhdojmë të kujdesemi për dhëmbët dhe gingivat për një jetë më të mirë," - afirmon profesor Nicola West, sekretar i përgjithshëm i FEP.

"Karakteristikat unike të ambientit dhe profesioni stomatologjik kanë garantuar gjithmonë kontrollin e infeksioneve," - nënvizon profesor Filippo Graziani, ish president i FEP dhe president aktual i komitetit të projektit evropian të federatës. "Numri kompleksiv i profesionistëve të sektorit dentar që janë infektuar me Covid-19 është jashtëzakonisht shumë i ulët në krahasim me popullsinë e përgjithshme, edhe në periudhën e parë të pandemisë."

Stomatologjia është përgatitur mirë për të parandaluar çdo risk infektimi që lidhet me pandeminë aktuale, sepse profesioni po përshtat masa efikase për të garantuar sigurinë qoftë për pacientët qoftë për profesionistët. Është e rëndësishme që të mbajmë mend që anashkalimi i shëndetit oral edhe për një periudhë kohore të limituar, mund të ketë një impakt negativ në shëndetin e përgjithshëm sepse sëmundjet periodontale dhe dentare lidhen me gjendjet e rënda kronike. Sipas provave shkencore, një shëndet i keq oral mund të lidhet me diabetin, sëmundjet kardiovaskulare, demencën dhe gjendje të tjera të rënda.
"Dentistët dhe periodontologët janë gjithmonë të detyruar që të përdorin protokollet e mbrojtjes efikasë për mbrojtjen e pacientëve nga çdo infeksion," - shton profesor Graziani."

Duke u përqendruar në sensibilizimin mbi protokollet e sigurisë dhe mbi promovimin e përfitimeve të kujdesit për shëndetin oral dhe gingival në çdo moment, FEP ka lancuar në rrjetet sociale fushatën "Kthim në normalitet".
Të gjithë pacientët dhe profesionistët mund të shohin rekomandimet për Covid-19 në website e FEP (www.efp.org).

Përktheu: Valbona Spahia