Testime të shpejta për Covid-19

Sipas Cochrane Library duhen studime të reja për të konfirmuar saktësinë

Sipas një rishikimi të publikuar në Cochrane Library, nuk ka prova të mjaftueshme për të treguar se testimet point-of-care për evidentimin e pranisë së Covid-19 në komunitet apo në mjediset e kurave primare ose sekondare janë të sakta.
"Janë të disponueshme strategji të ndryshme diagnostikuese për identifikimin ose përjashtimin e infeksionit, identifikimin e personave që kanë nevojë për më shumë kura ose për testimin e pranisë së infeksionit të parakohshëm dhe përgjigjes imunitare," - thotë Jacqueline Dinnes, nga Universiteti i Birmingham në Britaninë e Madhe, autore kryesore e rishikimit.

"Testimet point-of-care mbi antigjenet dhe molekulat për zbulimin e infeksionit në zhvillim kanë potencialin për të lejuar zbulimin dhe izolimin e parakohshëm të rasteve të konfirmuara në krahasim me metodat diagnostikuese në laborator, me objektivin e reduktimit të transmetimit në shtëpi dhe në komunitet," - vijon ajo. Kërkuesit janë përqendruar në punime që kanë analizuar pikërisht testimin mbi antigjenet, që identifikojnë proteinat e pranishme te virusi duke përdorur pajisje njëpërdorimshe dhe testime molekulare, që zbulojnë ARN-në virale duke përdorur pajisje të lëvizshme ose fikse, për të vlerësuar efikasitetin.

Në mënyrë kompleksive kanë ekzaminuar 22 studime që vinin nga e gjithë bota, të cilët kanë krahasuar testimet point-of-care me analizën Rt-Pcr. Por ka rezultuar që tre të katërtat e studimeve nuk kanë ndjekur instruksionet e prodhuesve të testeve point-of-care. Për më tepër, në punime ishin të pranishme pak informacione mbi pjesëmarrësit në studim, pra nuk ishte e mundur që të thuhej nëse rezultatet mund të aplikohen te personat pa simptoma, me simptoma të lehta apo të rënda.
Ndër të tjera studimet kanë qenë shpesh në risk për bias, ose nuk ishin të detajuar përsa i përket metologjisë. "Aktualisht provat që ne zotërojmë nuk janë të mjaftueshme për të thënë që këto testime janë mjaft të saktë për t'u përdorur në praktikën klinike. Prandaj janë urgjentisht të nevojshme studime të tjera," - përfundojnë autorët.

Për më shumë informacione:
Rapid, point‐of‐care antigen and molecular‐based tests for diagnosis of SARS‐CoV‐2 infection. Cochrane Database of Systematic Reviews

Përktheu: Valbona Spahia