Dieta e gingivave të shëndetshme sipas SIdP

Mund të reduktohet me 40% inflamacioni. 7 “pilulat” e kujdesit vetjak për shëndetin e dhëmbëve dhe gingivave që i duhen thënë pacientëve

Me rastin e Self Care Day, ditës së dedikuar për gjestet e thjeshta që secili nga ne mund të bëjë për të përmirësuar shëndetin dhe mirëqenien, Shoqëria Italiane e Periodontologjisë dhe Implantologjisë (SIdP) duke ju përshtatur ditës ka nxjerrë disa rregulla "DIY" për t'u kujdesur për dhëmbët dhe gingivat dhe duke qenë edhe në stinën e verës i bën thirrje dentistëve që t'ja transmetojnë ato pacientëve të tyre.
SIdP i kërkon qytetarëve që të ruajnë shëndetin oral edhe gjatë periudhës së pushimeve dhe për ta bërë këtë përveç furçës dhe pastës së dhëmbëve apo manovrave të zakonshme që janë të nevojshme për higjienën në shtëpi, ata propozojnë edhe një dietë që mund të reduktojë me 40% inflamacionin gingival.
"Hapi i parë dhe më i rëndësishmi është që të përmirësohet dieta," - thonë nga SIdP, - "duke shtuar, në menu 'ushqime miqësore' si specat, rukola, vezët, skumbri, ribes dhe ananas, sepse këto ushqime mund të reduktojnë me 40% inflamacionin gingival për një apo dy muaj duke bërë të mundur që në shtator të rikthehemi me dhëmbë dhe gingiva plotësisht të shëndetshme."

"Ndryshimi i ushqimit është i pari në rregullat e self care që duhet mbajtur mend në këtë ditë që i dedikohet sjelljeve të përshtatshme për kujdesin ndaj vetes: në fakt ekzistojnë ushqime 'kurative' për gingivat, dhëmbët dhe implantet dentare, falë vetive të tyre anti-inflamatore, antioksiduese, antibakteriale dhe rregulluese të përgjigjeve imuntare," - observon Luca Landi, president i SIdP, - "në verë është veçanërisht e thjesht që të pasurojmë menunë e përditshme me ushqime të dobishme për dhëmbët dhe gingivat: vitamina C që gjendet te speci, rukola, kivi, ribes dhe ananasi për shembull është një antioksidante e fuqishme që mbron qelizat duke favorizuar rigjenerimin e indit lidhës. Vitamina D që përmban skumbria, toni, salmoni, karkalecat, midhjet dhe kërpudhat favorizon shëndetin e kockës e të dhëmbëve dhe ka veti antibakteriale në modulimin e përgjigjes imunitare, vitaminat A, E dhe kompleksi i vitaminës B janë anti-inflamatorë të fuqishëm dhe pothuajse një mjekim për sëmundjen periodontale; resveratroli që gjendet te rrushi, vera apo edhe te mollët dhe kikirikat është studiuar për parandalimin e sëmundjes periodontale. Bëhet fjalë për ushqime të vërteta, që ruajnë shëndetin e zgavrës orale: antioksidantë dhe yndyrna të insaturuara vegjetale apo të peshkut që kanë një efekt të shkëlqyer anti-inflamator, në të kundërt një dietë e pasur me yndyrna favorizon inflamacionin, duke amplifikuar efektet e sëmundjeve kronike si periodontiti, e njëjta gjë ndodh edhe nëse e ekzagjerojmë me sheqernat.

Modifikimi i dietës, duke reduktuar yndyrnat dhe sheqernat e përpunuar e duke shtuar konsumimin e perimeve, frutave, peshkut dhe frutave të thata, pas 4-8 javësh mund të sjellë reduktimin me mbi 40% të inflamacionit në nivelin e gingivave. Studimet më të fundit indikojnë një influencë edhe të suksesit të implanteve dentare që, duke u integruar me kockën përthithin të gjithë nutrientët që kanë efekte edhe në skeletin human."
"Rregullat DIY për mirëqenien e dhëmbëve dhe gingivave nuk kufizohen në një përmirësim të dietës: në fakt një stil jete i shëndetshëm mban nën kontroll inflamacionin e përgjithshëm dhe redukton probabilitetin e periodontitit dhe shqetësimeve gingivale," - kujtojnë ekspertët.
Më pas presidenti Landi vijon: - "Duhet të kujtojmë edhe që higjiena orale nuk shkon me pushime, ndaj një përdorim i saktë i furçës dhe pajisjeve të tjera të higjienës si filli interdentar apo furça interdentare janë thelbësore. E njëjta gjë vlen edhe për vëmendjen ndaj normave higjienike: larja e shpeshtë e duarve vijon të jetë e domosdoshme.
Së fundi, një rregull thelbësor: Njohja e simptomave të sëmundjeve gingivale është vendimtare për t'i përballuar sa më mirë.

Më poshtë janë 7 këshillat për kujdesin vetjak që SIdP ka lancuar për pacientët në lidhje me shëndetin e dhëmbëve dhe gingivave:
1.Të përditësohemi: sëmundjet gingivale janë të shpeshta ndaj është e rëndësishme që të dimë të njohim simptomat;
2.Të rekuperojmë mirëqenien psiko-fizike, me ndonjë ditë pushimi për të zvogëluar stresin.
3.Të lëvizim: është e mjaftueshme që të kryejmë gjysmë ore në ditë një aktivitet, duke filluar nga ecja deri te kërcimi
4.Të lajmë duart: është mirë që të ndjekim norma rigoroze higjienike edhe nëse kalojmë më shumë kohë në mjedise të hapura.
5.T'i themi lamtumirë zakoneve të këqija si duhanpirja apo konsumimi i tepërt i alkoolit.
6.Të hamë shëndetshëm, duke vendosur në tavolinë fruta, perime dhe peshk.
7.Të marrim me vete furçën, sepse higjiena orale nuk duhet të shkojë kurrë me pushime!

Përktheu: Valbona Spahia