Koronavirusi: BE-ja përgatitet për menaxhimin e një vale të dytë të mundshme

Njoftimi është bërë nga Komisioni Evropian duke theksuar edhe se nevoja për të përballuar vatrat e reja në mënyrë eficiente do të kërkojë një koordinim të ngushtë ndërmjet shteteve

Mbulimi me testime të shumta, gjurmimi i kontakteve, përmirësimi i mbikëqyrjes, akses më i madh në shërbimet mjekësore, këto janë parapërgatitjet e BE-së për një valë të dytë të mundshme të koronavirusit dhe ka paraqitur një grup masash ndërmjet të cilave edhe dakordësinë për ndërveprimin e aplikacioneve për gjurmimin përtej kufijve kombëtarë. Këtë njoftim e ka bërë Komisioni Evropian duke theksuar edhe se nevoja për të përballuar vatrat e reja në mënyrë eficiente do të kërkojë një koordinim të ngushtë, me veprime afatshkurtër dhe afatgjatë për të përforcuar përgjigjen e shteteve.

Ndërmjet masave përfshihen edhe ato që garantojnë qarkullimin e lirë të furnizimeve mjekësore thelbësore për BE-në, përmbushjen e marrëveshjeve me prodhuesit e vaksinave dhe lehtësimin e studimeve klinike në shkallë të gjerë. Brukseli propozon edhe financime dhe lehtësime të transportit të ekipeve mjekësore në BE dhe ndërmjet shteteve anëtare si edhe tranferimin e pacientëve ndërmjet shteteve. Një vëmendje e veçantë dhe një mbështetje i duhet dhënë personave vulnerabël, të moshuarve dhe atyre që kanë patologji të tjera mjekësore. Fokusi duhet kthyer edhe te gripi stinor, nëpërmjet një mbulimi më të madh me vaksinë për të lehtësuar peshën.

"Tashmë dimë më shumë në lidhje me virusin por detyra jonë është që të qëndrojmë vigjilentë dhe parandalues. Masat e paraqitura sot synojnë të kundërshtojnë vatrat e mundshme të Covid-19", - ka afirmuar Margaritis Schinas, zëvendës president i Komisionit Evropian.
"Duke parë mësimet e marra muajt e fundit, ne po planifikojmë paraprakisht që të shmangim improvizimet, duke forcuar tregun unik dhe lirshmëritë kryesore dhe duke lehtësuar rrugën drejt ringritjes ekonomike dhe sociale në të gjithë BE-në," - shton ai.

"Virusi është ende në qarkullim. Mbikëqyrja, përgatitja dhe koordinimi janë të domosdoshëm për të parandaluar vatrat e përgjithësuara," - ka thënë Stella Kyriakides, përfaqësuese evropiane për shëndetin. "Sot kërkojmë një veprim të fortë dhe solidar për të mbrojtur qytetarët tanë dhe për të mbështetur shtetet anëtare që ta bëjnë këtë. Është përgjegjësia jonë që të sigurohemi që jemi plotësisht të përgatitur. Tashmë nuk është momenti për të ulur mburojat," - ka saktësuar ajo.

Përktheu: Valbona Spahia