COVID-19 dhe stomatologjia. Një përmbledhje nga doktor Roberto Burion

Emergjenca nga koronavirusi, si po ndryshon virusi dhe si do të ndryshojë profesionin dentar janë pikat e analizuara dhe shpjeguara nga një prej ekspertëve në fushë: virologu Roberto Burioni.
Doktor Burioni ka përmbledhur kuadrin e përgjithshëm të situatës, duke na dhënë indikacione për skenaret reale të së ardhmes me një supozim: është një virus për të cilin ende kemi shumë pak njohuri dhe prandaj duhet pranuar se shumë pyetje do vazhdojnë të mbeten pa përgjigje.

Kur do munden stomatologët që të rihapin plotësisht praktikat e tyre? Kur do rikthehet gjithçka në normalitet?
Për pyetjen e dytë doktor Burioni nuk ka një përgjigje, vetëm nëse ndodh që të gjendet një vaksinë ose të paktën të identifikohen barnat që tashmë janë në treg të cilat mund të ndihmojnë në dobësimin e virusit apo ta bëjnë atë më pak agresiv. Sidoqoftë në lidhje me pyetjen e parë ai është i qartë. Duhet ta pranojmë se profesioni i një stomatologu dhe ai i otorinolaringologut janë më të riskuarit.
"Stomatologët trajtojnë persona që janë të sëmurë, mund ta kuptoj që një sallon bukurie mund të punojë si normalisht por për stomatologët është ndryshe. Kur shkoj te stomatologu, shkoj sepse kam një problem shëndetësor për të zgjidhur dhe nëse nuk e zgjidh ai përkeqësohet. Mendoj se aktiviteti mjekësor duhet të rifillojë menjëherë përndryshe gjatë muajve në vijim do të paguajmë çmime më të larta për shkak të patologjive më të rënda të kavitetit oral. Kush ka probleme me dhëmbët duhet t'i trajtojë ata përndryshe më vonë do jetë i detyruar të kryejë devitalizimin ose akoma më keq ekstraksionin e tij."
"Sigurisht," - vijon dr. Burioni, - "stomatologët duhet të punojnë me masa sigurie, duke u bazuar në udhëzimet e dhëna për sigurinë e tyre, t'i respektojnë ato, t'i ndjekin, të matin temperaturën e pacientit dhe bashkëpunëtorëve dhe nëse kanë dyshime t'i kthejnë ata në shtëpi."
Dr. Burioni, më pas jep disa indikacione për profesionistët duke filluar që nga vëmendja që duhet t'i kushtojnë dezinfektimit të sipërfaqeve, me detergjent normal dhe deri te përdorimi i pajisjeve të përshtatshme për mbrojtjen personale.

Në lidhje me maskat ai rikujton se maskat kirurgjikale duhet të përdoren nga ata që nuk janë në kontakt të afërt me pacientin, personat që punojnë me pacientët duhet të përdorin maskat FFP2, FFP3 dhe N95.
Dr. Burioni pranon se menaxhimi i pacientit duhet të ndryshojë krahasuar me mënyrën si është menaxhuar më parë dhe këshillon: Që në sallën e pritjes të futet vetëm një person, po ashtu edhe në dhomën ku do kryhet trajtimi; në rastin e pacientëve të vegjël ose pacientëve që duhen shoqëruar nga një kujdestar apo prind, personi që i shoqëron duhet të qëndrojë larg profesionistit dhe të mbajë një maskë kirurgjikale.
Në fund të çdo vizite, çdo sipërfaqe duhet pastruar dhe duhen hapur dritaret për ajrim. E njëjta procedurë duhet kryer edhe në sallën e pritjes dhe në zonat e tjera ku ka qëndruar apo ecur pacienti.
Doktor Burioni ka përmendur edhe testet e shpejta, që sapo të miratohen, mund të jenë shumë të dobishme për stomatologët në mënyrë që të kuptojnë nëse pacienti apo ndonjë person nga stafi i tij është ndoshta i infektuar.

Përktheu: Valbona Spahia