Dita evropiane e gingivave të shëndetshme. Një rast për të motivuar pacientët për një vizitë kontrolli

SIdP rikujton sesi karantina mund të ketë riskuar shëndetin e gingivave dhe këshillon për një kontroll sa më shpejt të jetë e mundur

Me fillimin e fazës 2 të emergjencës shëndetësore, është momenti që të fillojmë të mendojmë edhe për shëndetin dentar që e kemi lënë pas dore këto javë karantinimi. Ekspertët e Shoqërisë Italiane të Periodontologjisë (SIdP) e kanë rikujtuar këtë me rastin e Ditës evropiane të gingivave të shëndetshme, që përkon me datën 12 maj, duke bërë thirrje që t'i kushtohet vëmendje simptomave të inflamacionit gingival.

"Rikthimi i kontrolleve rutinë do të jetë i domosdoshëm për të gjithë njerëzit që vuajnë nga shqetësimet gingivale, sepse pa vizita të rregullta risku i problemeve të gingivave mund të rritet," - thekson SIdP.
Dhe në këtë fazë do të jetë vendimtar roli i stomatologut në motivimin e pacientit për rikthimin në vizitat e kontrollit, të paktën për ata që janë në risk më të lartë.

"Impakti i sëmundjeve gingivale në shëndetin e përgjithshëm është i vazhdueshëm dhe mund të jetë edhe më i madh në kohët e pandemisë nga COVID-19: gingiviti, periodontiti dhe peri-implantiti në fakt janë sëmundje inflamatore kronike që kërcënojnë shëndetin e përgjithshëm të individit, që në këtë periudhë është vënë edhe më shumë në provë", - observon në një shënim Luca Landi, president i SIdP.
Dhe Dita evropiane e gingivave të shëndetshme është sigurisht rasti për të sensibilizuar pacientët dhe qytetarët që të rikthehen te stomatologu i tyre për një vizitë kontrolli pas kësaj periudhe ku aktiviteti stomatologjik ka qenë i mbyllur për shkak të riskut të infektimit nga COVID-19. Ndaj SIdP i bën thirrje të gjithë qytetarëve që në rast se kanë simptoma gingivale, t'i drejtohen stomatologut të tyre sa më shpejt të jetë e mundur.

"Klinikat dentare,"- shpjegon për shtypin presindenti Landi, - "janë në gjendje që të veprojnë me siguri maksimale te pacientët, duke garantuar të gjitha tutelat shëndetësore të nevojshme dhe duke kryer edhe një intervistë të personalizuar nëpërmjet telefonit për të vlerësuar kështu nëse situata është urgjente apo jo. E rëndësishme është të mos ulim barrierat mbrojtëse për simptomat e sëmundjeve gingivale, në këtë moment edhe më të vështirë se në të shkuarën."

Përktheu: Valbona Spahia