Shkëmbimet e materialeve dhe manufakteve ndërmjet klinikës dhe laboratorit dentar në kohën e COVID-19

Ndërmjet shumë procedurave që janë përmendur në indikacionet e dhëna në Itali nga Ministria e Shëndetësisë, që duhen ndjekur nga klinika dentare për të shmangur infektimin me COVID-19 janë përmendur edhe ato të menaxhimit të marrjes së gjurmëve dhe të gjitha pajisjeve protetike që vijnë apo dërgohen në laboratorin dentar. Dokumenti indikon se marrja e gjurmëve dhe shkëmbimi i manufakteve ndërmjet laboratorit dentar dhe klinikës kanë qenë një faktor i mundshëm risku për transmetimin e kryqëzuar të infeksionit nga kontakti me materialin e infektuar edhe përpara pandemisë.

 "Përpara se klinika të bëjë ambalazhimin e gjurmëve duhet t'i lajë dhe dezinfektojë ato me anë zhytjes ose nëpërmjet një spraji," - është indikuar. "Këshillohet që të konsultohemi me indikacionet e materialit me të cilin janë marrë gjurmët në lidhje me përputhshmërinë me dezinfektantët. Virusi mund të jetë i inaktivizuar në mënyrë efikase nga dezinfektimi i sipërfaqes për një minutë, me solucione që përmbajnë 62-71% etanol, 0.5% peroksid hidrogjeni ose 0.1% hipoklorur natriumi, kripëra amoni kuaternar dhe fenoksietanol. Agjentë të tjerë biocidë si kloruri i benzalkonit në 0.05-0.2% ose klorheksidinë diglukonat në 0.02% janë më pak efikasë."

Në dokumentin e ministrisë është indikuar se veprimet që duhet të kryhen nga profesionistët e klinikës përpara dërgimit të materialit në laboratorin dentar janë si në vijim: 
1.Larja e materialit protetik ose gjurmës menjëherë pasi hiqet nga goja e pacientit, mbetjet organike nëse nuk hiqen menjëherë inhibojnë veprimin e dezinfektantit.
2.Sterilizimi i materialit në mënyrë që të durojë trajtimin në autoklavë ose dezinfektimin fizik (metalet dhe qeramikat); dekontaminimi me dezinfektant i materialeve që nuk janë të përshtatshme për trajtimet fizike (gjurmët, dylli, rezinat). Veprimet e dezinfektimit duhet të kryhen duke veshur pajisjet mbrojtëse, mundësisht në zonën ku është kryer trajtimi.
3.Pas dezinfektimit, duke përdorur një palë doreza të tjera të pastra, të vendoset materiali në një qese dhe të ngjitet.
4.Moduli i përshkrimit të plotësohet jashtë zonës operative dhe të vendoset në një qese plastike më vete për të shmangur kontaminimin.
5.Të sinjalizohet në përshkrim risku i infektimit dhe të specifikohen veprimet që janë kryer për dezinfektimin. Këshillohet përshtatja e një liste kontrolli të shkruar për të gjithë profesionistët e përfshirë në menaxhimin e manufakteve.
6.Protezat dentare, aparatet dhe luga për marrjen e gjurmëve kur vijnë nga laboratori duhet të dezinfektohen siç u indikua më lart, përpara se të futen në ambientet operative. I duhet kushtuar vëmendje dezinfektimit të ambalazhit dhe përpunimit të duhur të materialeve që vijnë nga jashtë.
7.Materialet e përshkueshme (shkumësi, alginate) mund të mos dezinfektohen plotësisht nga COVID-19, prandaj këshillohet prekja dhe punimi i tyre me doreza dhe pajisje mbrojtëse. Duhet të shmanget kontakti i manufakteve të kontaminuara me materialet në shkumës. Përshtatja e materialeve të qëndrueshme ndaj ujit (elastomeret për marrjen e gjurmës, materialet plastike për modelet) lehtësojnë procedurat e dezinfektimit.
8.Dixhitalizimi i disa procedurave (marrja e gjurmëve, stampimi i modeleve, modulet e përshkrimit) redukton riskun e kontaminimit të kryqëzuar.

Përktheu: Valbona Spahia