Covid-19: 6 hapat e këshilluar nga ADA për rikthimin në punë

Task force e ADA ka krijuar një “Tool kit” për të ndihmuar stomatologët amerikanë në fazën delikate të rihapjes së klinikave dentare gjatë pandemisë nga Covid-19

Cristoforo Zervos

ADA ka krijuar një Task force (të përbërë nga stomatologë profesionistë, specialistë dhe shkencëtarë të saj) për të mbështetur stomatologët që duhet të rikthehen së shpejti në klinikat e tyre dentare pas kufizimeve të shkaktuara nga Covid-19. Një nga misionet kryesore të Task force ishte krijimi i një guide ("Tool kit"), të bazuar në rekomandimet e "Center for Disease Control and Prevention", me një seri instrumentesh dhe procedurash për të ofruar asistencë në trajtimin e pacientëve, edhe në rastet jo emergjente.
Në dokumentin e ADA-s shpjegohet se jo të gjithë stomatologët në mbarë Amerikën do i rikthehen punës menjëherë, ndaj duhet të përdorin gjykimin e tyre profesional, duke marrë në konsideratë rastet e COVID-19 në zonën e tyre, nevojat e pacientëve të tyre dhe disponibilitetin e shërbimeve të nevojshme për rihapjen e klinikave të tyre.

Në mënyrë të përmbledhur "Tool kit" këshillon:
1) Një letër mirë se ardhjeje për pacientin, në mënyrë që ta bëjmë të ndjehet mirë dhe njëkohësisht ta përditësojmë me modifikimet dhe instrumentet e parandalimit që janë vënë në zbatim nga klinika.
2) Një proces skrinimi, përpara takimit dhe ardhjes së pacientit, për të vendosur mirëpritjen e duhur dhe trajtimet specifike të rasteve të ndryshme;
3) Një protokoll pranimi për pacientin që vjen në klinikë (p.sh., dezinfektant për duart, matja e temperaturës me skanim në ballë, përdorimi i materialeve njëpërdorimshme);
4) Përgatitja e sallës së pritjes: vendosja e dezinfektantit në hyrje të sallës, materiale njëpërdorimshme në tualet dhe në të gjitha zonat e tjera (letra, detergjentë dhe dezinfektant) apo vendosja e një koshi në çdo dhomë. Largimi i karrigeve në sallën e pritjes ose përdorimi i ndarëseve në pleksiglas, heqja e të gjitha objekteve në sallën e pritjes (lojëra, revista, telekomanda) apo dezinfektimi i tyre rregullisht në fund të çdo dite pune, dezinfektimi i ambienteve në mënyrë konstante: karriget, sipërfaqet, pulsantët, dorezat, varëset e rrobave dhe të gjitha objektet që mund të kenë pasur kontakt me pacientët.
5) Një listë kontrolli për përgatijen e sallave operative: vendosja e një numri minimal personeli që është i dobishëm për çdo trajtim specifik të pacientit, limitimi sa më shumë të jetë e mundur i praktikave burokratike në sallën operative duke limituar përdorimin e dokumenteve në letër dhe duke mbajtur distancë nga pacienti, mbulimi i tastierës së kompjuterit me qese transparente, limitimi i vizitave në sallën operative vetëm me pacientin kur është e mundur. Kurdo që pacienti vjen i shoqëruar, të pajisen me DPI të përshtatshme (maska, doreza lateksi).
6) Protokollet për menaxhimin e personelit: dezinfektimi i rregullt dhe përdorimi i DPI në recepsion, higjiena e duarve me detergjentë neutralë, syze mbrojtëse ose mbrojtëse fytyre, të gjitha njëpërdorimshe dhe larja e veshjeve dhe përparëseve pas përdorimit, nëse është e mundur të përdoren veshje me mëngë të gjata dhe të vihet një lavatriçe në klinikë në mënyrë që në fund të çdo dite veshjet të futen të lahen menjëherë.

"Sfida që kemi përballuar gjatë formulimit të këtij dokumenti ka qenë ajo e balancimit të futjes së një protokolli të ri për të përballuar pandeminë nga COVID-19 me masat e kontrollit të infeksioneve ekzistente, masat që stomatologët kanë përdorur gjithnjë prej vitesh për të ofruar një trajtim të sigurt për pacientët e tyre," - ka deklaruar Kirk M. Norbo, bashkë-president i Task force-s së ADA-s.
"Ky dokument ka si qëllim rritjen e protokolleve aktuale për të përballuar më mirë infeksionin e ri nga koronavirusi. Me siguri kjo do të jetë një hartë e vlefshme për rrugën që do ndiqet pas rihapjes së klinikave dentare në siguri të plotë," - përmbyll Norbo.

Përktheu: Valbona Spahia