Tumori i zgavrës orale: prek gjithnjë e më shumë të rinjtë për shkak të zakoneve të reja seksuale

Sot në botë numërohen rreth 50 mijë raste të reja në vit të tumorit të laringut dhe zgavrës orale dhe kjo e dhënë rezulton në rritje sidomos në vendet e industrializuara, kur këto raste paraqesin deri në 15-30% të të ashtuquajturve tumore të kokës dhe qafës. Për këtë arsye Ospedale Fatebenefratelli në Isola Tiberina (Romë) ka aderuar në fushatën evropiane të parandalimit të tumoreve të zgavrës orale Make Sense Campaign 2019, të promovuar në Ehns (European Head and Neck Society) me Aiocc (Associazione Italiana Oncologia Cervico-Cefalica), për vizita falas për të rritur ndërgjegjshmërinë për disa simptoma që nuk duhen nënvlerësuar sepse janë të dobishme për një diagnozë të hershme të tumorit të traktit orofaringeal.

"Në ditët e sotme tumori i traktit orofaringeal lidhet me një numër në rritje të personave të rinj, ndërmjet 20 dhe 40 vjeç," - shpjegon në një deklaratë Marco Radici, Drejtor i Njësisë së Otorinolaringoiatrisë së Fatebenefratelli në Isola Tiberina, që ka qenë një pikë referimi për diagnozën dhe trajtimin e kësaj neoplazie. "Nëse deri në vitet '80 fenomeni lidhej në mënyrë prevalente me meshkujt mbi 60 vjeç, duhanpirës ose pijedashës, tashmë nga të dhënat rezulton se është zgjeruar grupmosha për të dyja gjinitë dhe përveç duhanit, alkoolit apo gjenetikës është shtuar edhe një faktor tjetër siç janë zakonet e reja seksuale." Veçanërisht ndërmjet faktorëve nxitës, vëmendja e mjekëve është kthyer tek infeksionet e provokuara nga Papilloma Virus Human (HPV), që vijnë si pasojë e sjelljeve që lidhen me sferën seksuale. "Identifikimi i pacientit që paraqet sëmundje neoplastike të zgavrës orale dhe të orofaringut ka ndryshuar plotësisht," - thotë profesor Radici.

Ndërmjet të tjerash është edhe identifikimi i pacientit që nuk është domosdoshmërisht duhanpirës por është i lidhur me një alkoolizëm të pavetëdijshëm. Kjo sjellje lidhet edhe me aktivitetin social dhe karakterizohet nga predispozita seksuale."

Ospedale, për këtë arsye në vend të fushatës së vizitave falas ka aktivizuar një shërbim për parandalimin e tumoreve në traktin orofaringeal: një klinikë me tarifa të ulëta për diagnostikimin e parakohshëm në rrugët e sipërme ajrore-digjestive (zgavra orale, orofaringu, laringu, hipofaringu), duke filluar nga testi i Papilloma Virus Human (HPV).

"Nëpërmjet një kampioni të pështymës është e mundur që të identifikojmë praninë e shtameve që janë konsideruar më të rrezikshëm për këtë lloj tumori (8,16 dhe 3)," - vijon Radici - "një hap përpara në parandalimin primar të kësaj patologjie që lidhet me HPV, prognoza e së cilës është padyshim më e mira, me norma të vdekshmërisë (-28%) dhe mundësinë e recidivës inferiore (-49%) në krahasim me tumoret e tjera të të njëjtës pjesë, trajtimi i secilit zakonisht nuk kërkon ndërhyrje kirurgjikale por thjesht radio-kimioterapi."

Përktheu: Valbona Spahia