Shëndeti oral nuk shkon me pushime!

Nga ekspertët AIOP 12 këshilla për të shpëtuar buzëqeshjen gjatë muajve të nxehtë

Jo vetëm djegiet nga dielli, kongjestionet, pickimet nga insektet dhe kandilat e detit apo tërheqjet muskulore nga sportet e improvizuara janë incidentet më të pakënaqshme që mund të prishin pushimet e shumëpritura verore. Një dhimbje dhëmbësh e papritur, mbushja që bie, një kurorë provizore që shkëputet, një dhëmb që thyhet, nuk janë ndodhi kaq të rralla dhe mund të na prishin momentet e merituara të relaksit, duke pasur parasysh se gjendemi larg shtëpisë, ndoshta jashtë shtetit ose dentisti i besuar nuk është i disponueshëm.

Në shumë raste, t'i kushtosh pak më shumë kujdes mirëqenies dentare edhe gjatë verës dhe t'i nënshtrohesh kontrolleve të duhura mund të jetë e mjaftueshme për të shmangur surpriza jo të këndshme. Nga ekspertët e Akademisë Italiane të Stomatologjisë Protetike (AIOP) vijnë këshillat për të ruajtur bukurinë dhe shëndetin e buzëqeshjes gjatë pushimeve.

Cilat masa duhet të vëmë në zbatim para se të nisemi dhe gjatë pushimeve nëse do të kishim një emergjencë?

1. Mbi të gjitha është mirë që të programojmë në kohë një vizitë kontrolli: jo gjithmonë klinikat stomatologjike janë të hapura gjatë gjithë verës dhe mund të ndodhë një urgjencë kur dentisti juaj i besuar mungon. "Në pritje të pushimeve që po vijnë, planifikimi paraprak është gjithmonë arma më e mirë," - shpjegon Paolo Vigolo, President i AIOP. "Kjo sjellje e kujdesshme këshillohet kryesisht për ata persona që kanë dhëmbë të ndjeshëm, që kanë kryer tashmë trajtime të një farë rëndësie; por nuk duhet të harrojmë edhe se lezionet dentare 'të heshtura' janë të shpeshta dhe në gojë të shëndetshme: prandaj gjithsesi këshillohet një vizitë te specialisti".

2. Përveç kontrollit është e përshtatshme që t'i nënshtrohemi një seance higjiene profesionale nëse kemi kohë që nuk e kemi kryer në mënyrë që të shmangim pllakën dhe tartarin, shkaqe të inflamacioneve gingivale dhe infeksioneve periodontale.

3. Nëse parashikoni udhëtime me avion ose zhytje nënujore, pyesni dentistin që të verifikojë gjendjen e shëndetit të mbushjeve tuaja të vjetra: nëse ato do të ishin joefektive ose të infiltruara, ndryshimet e presionit mund t'i linin shkas dhimbjeve shumë të bezdisshme. Nëse do të binte një mbushje është e nevojshme që të shmangim pije apo ushqime shumë të ftohta dhe të mbajmë dhëmbin sa më pastër të jetë e mundur. Për të zvogëluar dhimbjen e provokuar nga kontakti me ushqimet mund të vendosim në kavitet një shuk të vogël pambuku i cili duhet të jetë gjithmonë i pastër dhe të ndërrohet shpesh.

4. Nëse niseni menjëherë pas ndonjë ndërhyrje të vogël kirurgjikale në gojë (ekstraktim i një dhëmbi, vendosja e një implanti etj.), shmangni ekspozimet në diellin e fortë gjatë ditëve të para të trajtimit të kryer dhe ndiqni me përpikmëri këshillat e dentistit tuaj për të minimizuar bezdisjet. Nxehtësia e tepërt në fakt përcakton vazodilatacionin duke shtuar riskun e fryrjeve.

5. Nëse keni kurora të fiksuara me një cement provizor apo proteza të vjetra fikse, kontrollojini para se të niseni për udhëtim në mënyrë që të reduktoni riskun e shkëputjes gjatë pushimeve. "Mund të jetë e dobishme," - shton Vigolo - "që të kemi gati një set për ngjitje që mund të blihet në të gjitha farmacitë: në rastin e shkëputjes aksidentale të një kurore apo të një ure, provizore apo të përhershme qofshin, këto sete lejojnë zgjidhjen e incidenteve me një siguri të mirë në pritje që të mund të udhëtojmë për te një dentist. Më parë është e nevojshme që të pastrojmë mirë dhëmbët nga mbetjet e cementit të vjetër apo të ushqimit dhe t'i thajmë me kujdes me një garzë për të reduktuar në minimum lagështinë që do të zvogëlonte efektin adeziv në cementin e ri."

6. Nëse mbani proteza të lëvizshme, kontrollojini të paktën 2 javë para se të niseni: ndonjëherë ndodh që të kenë fillim të një frakture që kalon e pa vënë re por duke vazhduar mund të shkaktojë thyerjen e plotë të protezës. Në rast se kryhen modifikime (p.sh. ribazim) është e thjeshtë që në ditët e para të nevojitet që të kryhen rregullime. Dhe kush ka një aparat ortodontik është mirë që t'i nënshtrohet një kontrolli parandalues që të minimizojë kështu riskun e shkëputjes së braketave apo llastiqeve gjatë pushimeve.

7. Nëse keni proteza fikse apo të lëvizshme të ankoruara në implante të integruar në kockë merrni me vete "pasaportën" implantare me kodet e implanteve tuaja: në rast nevoje (zhvidhosje, decementime etj.) do të jetë më e thjeshtë për dentistin që do të kujdeset për ju që të identifikojë komponentët implantar të duhur për të zgjidhur problemin tuaj.

8. Këshillohuni nga dentisti i besuar për barnat e mundshëm (kundër dhimbjeve, antibiotikët etj.) që do të ishte e dobishme të fusnit në valixhe dhe që t'i përdornit në rast nevoje. Mos harroni të ruani numrin e tij të telefonit që të mund ta kontaktoni dhe në distancë nëse klinika e tij do të ishte e hapur. Në rast të kundërt pyeteni nëse në zonën ku do të shkoni me pushime njeh ndonjë koleg të besuar të cilit mund t'i drejtoheni për një emergjencë të mundshme.

9. Nëse do t'ju ndodhte një dhimbje dhëmbi e papritur mund të merrni një analgjezik që iu është këshilluar ose që përdorni zakonisht për dhimbjen e kokës apo për dhimbjen e shpinës. Por mbani mend që anti-inflamatorët duhen marrë gjithmonë pas ushqimit dhe pa e ekzagjeruar me sasinë pasi efektet e mundshme anësore nuk janë të rralla dhe ndikohen nga sasia. Nëse dhimbja nuk ndalon do të thotë se nevojitet me urgjencë ndërhyrja e një stomatologu.

10. Në prani të një abscesi për të lehtësuar dhimbjen mund të aplikoni akull në faqe ose mund të mbani në gojë ujë shumë të ftohtë. Në këto raste kura e duhur është një terapi antibiotike që të luftojë infeksionin: në mungesë të një dentisti këshillohet që të kontaktoni Qendrën e Emergjencave Mjekësore. Ndërkohë mund të bëni shpëlarje me ujë dhe kripë për të vijuar më pas me larjen delikate të dhëmbëve me furçë dhe pastë dhëmbësh.

11. Nëse thyhet një dhëmb nuk është e volitshme që të vendosim akull dhe duhet shmangur kontakti me ushqime dhe pije shumë të ftohta. Nëse dhemb mund të pini një anti-inflamator duke i kërkuar këshillë farmacistit. Sa më shpejt të jetë e mundur një dentist duhet të vlerësojë nëse është e mundur që të rivendosë pjesën e rënë që ndërkohë duhet ruajtur në qumësht ose në një solucion me ujë dhe kripë.

12. Nëse në fund të parashikimit të udhëtimit doni një buzëqeshje të shndritshme kur stomatologu juaj do të ketë kontrolluar gjendjen e shëndetit të dhëmbëve dhe të gingivave, mund t'i kërkoni që të kryejë një zbardhim për t'i dhënë gojës një pamje akoma më të kuruar.

"Në përgjithësi," - përmbyll Vigolo, - "nëse gjatë pushimeve do të tundoheni nga një ëmbëlsirë apo akullore më shumë nuk është një dramë por jini të kujdesshëm për higjienën orale: kariesi nuk shkon me pushime. Pasta e dhëmbëve dhe furça janë aleatët më të mirë për shëndetin e dhëmbëve tanë, sidomos nëse mbani proteza apo aparate fikse që kërkojnë një kujdes të veçantë për pastërtinë".

Nën kujdesin e Zyrës së Shtypit të Odontoiatria33

Përktheu: Erjola Taga