Studim i randomizuar i një aplikacioni për smartphone për përmirësimin e higjienës orale

Nga Lara Figini

Metoda e konsideruar edhe sot më efikase për parandalimin e fillimit të kariesit dhe sëmundjeve periodontale është larja e dhëmbëve me furçë të paktën dy herë në ditë me një pastë me bazë fluori.

Pavarësisht se sot shumica dërrmuese e popullsisë deklaron se i lan dhëmbët të paktën çdo ditë, një pjesë e mirë e tyre manifeston ende shenja të sëmundjes periodontale, një indeks i qartë i pranisë së pllakës.
Ndoshta kjo pjesë e popullsisë kryen manovra të higjienës orale në mënyrë të pasaktë dhe të pamjaftueshme dhe ka nevojë për stimuj të tjerë nga kjo pikëpamje.

Tipologjia e kërkimit dhe modaliteti i analizës
Në një studim të publikuar në British Dental Journal në prill 2019, autorët synojnë të testojnë efikasitetin dhe pranueshmërinë e një aplikacioni për smartphone të përdorur në kombinim me një furçë, të cilës i është vendosur një sensor lëvizjeje për të promovuar kontrollin e pllakës.
Janë regjistruar në studim 108 pacientë të dy klinikave stomatologjike të përgjithshme.

Pjesëmarrësit janë zgjedhur rastësisht në një nga dy grupet si në vijim:
• grupi 1 ose grupi i testit ku pjesëmarrësit janë ftuar që të lajnë dhëmbët dy herë në ditë me një furçë inovative të pajisur me një sensor lëvizjeje që lidhej nëpërmjet një aplikacioni në smartphone e tyre (Brushlink, Lonely Media), i cili drejtonte manovrat e larjes së përditshme;
• grupi 2 ose grupi i kontrollit në të cilin pjesëmarrësit u ftuan që të lajnë dhëmbët dy herë në ditë me një furçë dhe metodë tradicionale.
Pas dy dhe katër javësh janë zbuluar te të gjithë pacientët e të dyja grupeve treguesit e pllakës orale për të gjithë gojën. Një pyetësor që i është bërë grupit të testit ka vlerësuar opinionet e pjesëmarrësve rreth pranueshmërisë së pajisjes së sensorit në lëvizjen dhe në aplikimin respektiv në smartphone.

Rezultate
Indeksi i pllakës në të gjithë gojën ka pësuar një reduktim me 70% (nga 40,1 deri në 11,7) në grupin e testit në krahasim me një reduktim nga 29,1 në 20,5 (30%) në grupin e kontrollit.

Pajisja është pranuar nga pacientët dhe pjesëmarrësit kanë deklaruar se janë të ndërgjegjshëm që kanë përmirësuar mënyrën e tyre të larjes së dhëmbëve dhe njohuritë rreth higjienës orale falë pajisjes inovative. Pacientët e grupit të testit kanë referuar se përdorimi i kësaj pajisjeje argëtuese i është dukur stimulues përveçse i thjeshtë për t'u përdorur.

Konkluzione
Nga të dhënat e nxjerra nga ky studim, që duhet të konfirmohen me punime të tjera analoge, mund të dalim në përfundimin se sigurimi i një feedback-u të menjëhershëm ditë pas dite te pacientët stomatologjikë mbi metodën e tyre të larjes së dhëmbëve çon në një përmirësim të higjienës orale dhe reduktime shumë të rëndësishme të niveleve të pllakës, të paktën për një periudhë të shkurtër.

Implikime klinike
Fëmijëve, pacientëve dembelë apo atyre që nuk arrijnë të kryejnë manovrat e sakta dhe konstante të higjienës orale në shtëpi stomatologu mund t'i propozojë një furçë inovative me një sensor lëvizjeje që lidhet me një aplikacion në smartphone për të drejtuar larjen me furçë, duke bërë që pacienti të kuptojë në mirë manovrat e sakta të higjienës orale dhe t'ua bëjë ato edhe më argëtuese.

Për më tepër:
Kay E, Shou L. A randomised controlled trial of a smartphone application for improving oral hygiene. Br Dent J 2019 Apr;226(7):508-11.

Përktheu: Valbona Spahia