Lezionet nga aget në stomatologji

Operatorët shëndetësorë në përgjithësi dhe stomatologët në veçanti, janë të prirur për t’u lënduar nga aget, duke u ekspozuar ndaj një rreziku të shtuar për infeksione...

Operatorët shëndetësorë në përgjithësi dhe stomatologët në veçanti, janë të prirur për t'u lënduar nga aget, duke u ekspozuar ndaj një rreziku të shtuar për infeksione.

OBSH dhe Administrata për Sigurinë dhe Shëndetin në Punë në SHBA (OSHA) kanë përpiluar udhëzimet për reduktimet e lezioneve nga aget, me qëllim mbrojtjen e operatorëve shëndetësorë. Edhe pse këto udhëzime universale e kanë reduktuar rrezikun për lezione nga aget, incidentet vazhdojnë.

Agjentët patogjenë të transmetuar përmes gjakut janë mikroorganizma infektivë, që gjendjen në gjakun e njeriut dhe mund të shkaktojnë sëmundje të rënda, edhe vdekjeprurëse te njerëzit.

Operatorët shëndetësorë, si: mjekët, kirurgët, infermierët, dentistët, studentët e stomatologjisë, asistentët dentarë, teknikët e laboratorit, personeli që merret me mbetjet e infektuara dhe profesionistë të tjerë shëndetësorë janë të rrezikuar nga ekspozimi ndaj këtyre agjentëve patogjenë. Lezionet perkutane të shkaktuara nga aget, ose nga objekte të tjera me majë, janë burimet kryesore të agjentëve patogjenë të transmetuar përmes gjakut në vendin e punës.
Lezionet nga shpimi me age kanë potencial të madh transmetimi dhe janë mënyra më e lehtë e transmetimit të agjentëve patogjenë përmes gjakut.

Tipologjia e kërkimit dhe metoda e analizës
Në një studim narrativ, të publikuar në Journal of the American Dental Association JADA, autorët janë thelluar mbi epidemiologjinë, etiologjinë dhe pasojat e protokolleve të menaxhimit dhe parandalimit të lezioneve nga shpimi me age.

Rezultatet
Ka mungesë literature mbi prevalencën e lezioneve nga shpimi me age në botë midis operatorëve dentarë dhe stomatologëve, për shkak të nën-raportimit të tyre nga mjekët.
Nga të dhënat e këtij studimi u vu në dukje se studentët e stomatologjisë dhe mjekët pa përvojë janë më të cenuarit. Gjithashtu, studimi i lartpërmendur evidentoi mospërputhje të qarta në udhëzimet dhe rekomandimet e organeve të ndryshme rregullatore dhe statutore të ngarkuara me kufizimin dhe menaxhimin e lezioneve nga shpimi me age.

Përfundimi
Nga të dhënat e këtij studimi, të cilat duhen vërtetuar edhe në punime të tjera të ngjashme, mund të arrihet në përfundimin se rreziqet më të mëdha profesionale për operatorët shëndetësorë në botë janë lezionet nga shpimi me age. Dentistët njihen si një nga grupet me rrezik të lartë për ekspozimin ndaj lezioneve nga shpimi me age.

Ndërlikimet klinike
Trajnimi i duhur dhe konciz i punonjësve të kujdesit shëndetësor dentar është thelbësor për parandalimin dhe menaxhimin e lezioneve nga shpimi me age.