Hipnoza në menaxhimin e dhimbjes akute dentare/maksilofaciale

Nga Lara Figini

Menaxhimi i dhimbjes akute në stomatologji shpesh nuk është i lehtë, veçanërisht kur kemi të bëjmë me trajtime kirurgjikale dhe implantare, ku ndonjëherë anestezia tradicionale nuk është e mjaftueshme ose nuk mund të aplikohet.

Në fakt, kundërindikimet ndaj anestezisë lokale nuk janë të rralla, si në rastet e pacientëve alergjikë ose reaksionet e intolerancës ndaj konservuesve, të cilët e bëjnë të pamundur aplikimin e anestezisë.

Prandaj, nevojiten alternativa ndaj anestezisë tradicionale për të qenë në gjendje të trajtohen pacientë të tillë me pak ose aspak dhimbje. Ndër këto atlerantiva spikat hipnoza, e cila mund të përdoret relativisht lehtë nga një profesionist i kualifikuar.

Tipologjia e kërkimit dhe modaliteti i analizës

Në një rishikim sistematik të kohëve të fundit, i cili do të publikohet në Journal of Dentistry në gusht 2022, autorët kanë vlerësuar sistematikisht efektet e hipnozës në lehtësimin e dhimbjes akute dentare/maksilofaciale.

Në rishikim u morën parasysh: studimet e kontrolluara me përzgjedhje rastësore, studimet e grupeve, provat klinike të kontrolluara, studimet ndërseksionale nëpërmjet udhëzimeve të PRISMA-s, të gjurmuara përmes pesë bazave të të dhënave elektronike të mëposhtme: Cochrane, Embase, MEDLINE nëpërmjet PubMed, LILACS dhe Scopus, të botuara në periudhën 1989-2021.

Vlerësimi i cilësisë së studimit u krye nëpërmjet NIH.

Rezultatet

Në shqyrtimin përfundimtar u përfshinë 27 artikuj dhe u krye edhe një metaanalizë.

Nga 27 studime, 14 prej tyre u vlerësuan si "të mirë" dhe 13 të tjerët si "diskretë". Asnjë nga studimet nuk u vlerësua si "i dobët".

Nga të dhënat u konstatua se hipnoza mund të zvogëlojë dhimbjet intraoperative dhe postoperative, dhe për rrjedhojë edhe përdorimin e analgjezikëve gjatë procedurave dentare.

Janë publikuar pesë studime mbi ekstraktimin e dhëmbëve nën hipnozë, pesë prej të cilave zgjodhën hipnozën si mbështetje për anestezinë lokale dhe vetëm dy përdorën hipnozën në mënyrë ekskluzive për të eliminuar dhimbjen.

Në rastet e përdorimit ekskluziv të hipnozës për nxjerrjen e dhëmbit të pjekurisë, pacientët kishin dukshëm më pak dhimbje gjatë dhe pas operacionit dhe marrja e qetësuesve ishte dukshëm më e vogël krahasuar me grupin e kontrollit.

Në rastet kur hipnoza ishte e kombinuar me anestezi lokale, tre nga pesë studime gjetën një ulje të ndjeshme të dhimbjes me hipnozë të mëtejshme.

Përsa i përket konsumit të qetësuesve, një reduktim i ndjeshëm u vu re në katër nga pesë studime.

Hipnotizueshmëria e pjesëmarrësve në studim u testua në 11 nga 27 studimet. Subjektet u ndanë në grupe me hipnotizueshmëri të ulët dhe të lartë, dhe subjektet me hipnotizueshmëri të lartë në përgjithësi reaguan më mirë ndaj hipnozës.

Teknika të ndryshme hipnoze u morën në konsideratë në studime të ndryshme, të përdorura për të lehtësuar dhimbjen dhe për të arritur relaksin.

Konkluzionet

Nga të dhënat e këtij rishikimi, të cilat duhet të konfirmohen në punime të tjera të ngjashme, mund të konkludohet se, megjithëse deri tani ka vetëm një numër të vogël studimesh mbi këtë temë, të dhënat ekzistuese konfirmojnë se hipnoza mund të lehtësojë dhimbjet akute dentare/maksilofaciale.

Implikimet klinike

Hipnoza ofron një alternativë të mundshme ndaj qetësuesve të dhimbjes konvencionale për dhimbjet akute të dhëmbëve dhe dhimbjet maksilofaciale, veçanërisht në rastin e alergjive ose kundërindikacioneve ndaj farmakologjisë dhe anestezisë tradicionale.

Për më shumë informacion:
Anuschka Erin Merz, Guglielmo Campus, Randi Abrahamsen, Thomas Gerhard Wolf. Hypnosis on acute dental and maxillofacial pain relief: a systematic review and meta-analysis. J Dent 2022;123:104184.