Komplikacionet post-operative pas ekstraksionit të molarëve të tretë: lembo në formë zarfi apo lembo trekëndor

Nga Lara Figini

Ekstraksioni kirurgjikal i molarëve të tretë mandibularë është një nga trajtimet më të shpeshta që kryhet nga kirurgët oralë dhe pavarësisht fushës së gjerë për procedura mini-invazive shqetësimi post-operativ për pacientët është gjithnjë i vështirë për t'u shmangur për shkak të komplikacioneve të shumta që lidhen me të.
Komplikacionet post-operative varen nga faktorë të ndryshëm, duke përfshirë shkallën e impaktimit, vështirësinë e procedurës kirurgjikale dhe teknikat kirurgjikale që janë zbatuar. Një nga fazat fillestare të procedurës kirurgjikale është dizenjimi i lembos, që mund të ndikojë shumë në shikueshmëri dhe akses duke influencuar rezultatet kirurgjikale post-operative. Janë zhvilluar lloje të ndryshme dizenjimi të lembos mucoperiosteal, ndërmjet të cilëve lembot në formë zarfi dhe ato në formë trekëndore, për të reduktuar shqetësimin post-operativ që vjen nga incizioni kirurgjikal.

Tipologjia e kërkimit dhe modaliteti i analizës
Në një rishikim sistematik, të publikuar në Journal of Oral and Maxillofacial Surgery në prill 2020, autorët kanë krahasuar rezultatet post-operative të ndërhyrjeve kirurgjikale të molarit të tretë mandibular të kryera me lembo në formë zarfi dhe lembo trekëndor.
Databazat PubMed, Embase, Web of Science dhe Cochrane Library janë përdorur për kërkime sistematikisht që nga data e fillimit në nëntor 2018. Janë përfshirë studime të randomizuara dhe jo të randomizuara të kontrolluara kurdo që përmbushnin kriteret e përfshirjes dhe përjashtimit. Variabla ishte dezajni i lembos: në formë zarfi apo në formë trekëndore.
Variablat e rezultatit ishin: koha e operacionit, dhimbja, trismus, incidenca e osteitit alveolar (AO), dehiscence e plagës dhe ënjtje. Vlerësimi metodologjik i sasisë është kryer në përputhje me udhëzimet e Cochrane Collaboration.
Meta-analiza është kryer duke përdorur Review Manager, Versioni 5.2.

Rezultate
Janë përfshirë një total prej 21 studimesh për sintezën cilësore, 18 prej të cilëve ishin përfshirë në meta-analizë. Ndërhyrjet që kanë parashikuar lembot me formë zarfi kanë kërkuar një kohë më të shkurtër të kryerjes së tyre.

Për ekstraksionet e molarëve të tretë të impaktuar të klasës A dhe B të Pell dhe Gregory, lembot në formë zarfi kanë rezultuar të lidhur me pikët e vlerësimit të shkallës së dhimbjes, të vlerësuar sipas shkallës VAS, në mënyrë të konsiderueshme më të ulët në ditët post-operative dhe me një shfaqje më të vogël të trismus në javën e parë pas ndërhyrjes. Incidenca e osteitit alveolar ka rezultuar më e madhe në rastet e trajtuara me lembo në formë zarfi.

Konkluzione
Nga të dhënat e nxjerra nga ky studim, që duhet të konfirmohen me rishikime të tjera analoge, mund të dalim në përfundimin se ndërhyrjet që parashikojnë lembo në formë zarfi kërkojnë një kohë më të shkurtër ndërhyrjeje në krahasim me lembot në formë trekëndore dhe lidhen me më pak dhimbje post-operative dhe trismus, në rastet e ekstraktimeve të molarëve të tretë të impaktuar të klasës A ose B të Pell dhe Gregory. Ndërsa lembot në formë trekëndore, lidhen me një incidencë të reduktuar të osteitit alveolar AO në krahasim me lembot në formë zarfi.

Implikime klinike
Punimet që janë aktualisht të disponueshme nuk janë të mjaftueshme për të sugjeruar përdorimin ekskluziv të njërit nga dy llojet e lembos. Prandaj, janë të nevojshme studime të tjera klinike të randomizuara multi-qendërshe dhe në një shkallë të gjerë për të vlerësuar këto rezultate.

Për më tepër:
Junfei Zhu, Xuguang Yuan, LiE Yan, Tianzhu Li, Mengkai Guang, e Ye Zhang. Comparison of postoperative outcomes between envelope and triangular flaps after mandibular third molar surgery: a systematic review and meta-analysis. J Oral Maxillofac Surg 2020 Apr 2;78(4):515-27.

Përktheu: Valbona Spahia