Enukleacioni i cisteve odontogjene mandibulare me përmasa të mëdha me mbështetjen e endoskopisë

Nga Lara FiginiNga Lara Figini

Enukleacioni, me ose pa graft kockor alogjenik, është procedura kryesore kirurgjikale për trajtimin e cisteve të vogla odontogjene. Megjithatë trajtimi i cisteve me dimensione të mëdha ka diskutime.

Disa autorë rekomandojnë enukleacione edhe të cisteve me dimensione të mëdha, të tjerë preferojnë të përdorin teknikën kirurgjikale të dekompresionit ose të marsupializimit. Enukleacioni i cisteve të mëdha mandibulare është një metodë invazive që zakonisht lidhet me komplikacione, si lezionet e pjesës së nervave ose frakturat jatrogjene.

Në vitet e fundit teknika të ndryshme kirurgjikale orale dhe maksilo-faciale janë përmirësuar shumë falë ndihmës së endoskopive që optimizojnë vizualizimin e fushës operative.

Tipologjia e kërkimit dhe modaliteti i analizës
Në një studim klinik, të publikuar në Oral Surgery, Oral Medicine, Oral Pathology and Oral Radiology në shkurt 2020, autorët kanë vlerësuar rezultatin klinik të enukleacionit të cisteve me përmasa të mëdha nëpërmjet ndihmës së endoskopit.

Pesëdhjetë e shtatë pacientë me ciste të mëdha odontogjene mandibulare janë regjistruar në këtë studim. Pacientët janë ndarë në dy grupe:
- Grupi 1: i përbërë nga 25 pacientë të trajtuar me enukleacion tradicional;
- Grupi 2: i përbërë nga 32 pacientë që i janë nënshtruar një enukleacioni me ndihmën e endoskopit.

Rezultate
Të gjithë pacientët i janë nënshtruar me sukses operacionit. Periudha e follow-up varionte nga 16 deri në 28 muaj. Recidiva është ndeshur në 2 pacientë (8%) në Grupin e enukleacionit tradicional; ndërkohë që në grupin e enukleacionit të ndihmuar nga endoskopi nuk është observuar asnjë recidivë.

Konkluzione
Nga të dhënat e nxjerra nga ky studim, që duhet të konfirmohen me punime të tjera analoge, mund të dalim në përfundimin se enukleacioni i cisteve të mëdha odontogjene mandibulare i ndihmuar nga endoskopi është një metodë efikase për të arritur një heqje të plotë të lezionit cistik duke ruajtur sa më shumë që të jetë e mundur indin përreth. Megjithatë, kirurgët duhet të kenë kompetencat e duhura në përdorimin e endoskopit për të arritur rezultate optimale.

Implikime klinike
Kirurgu oral, që duhet të përballojë një ndërhyrje të enukleacionit të cisteve odontogjene mandibulare me përmasa të mëdha, mund të besojë në ndihmën e endoskopisë për të arritur një heqje të plotë të lezionit cistik duke ruajtur mjedisin përreth.

Megjithatë, studime të randomizuara duhet të kryhen për konfirmime.

Për më tepër:
Yan Wang, Shaohai Chang, Zhaoyu Lin, Rui Chen, Zhiquan Huang. Endoscopic-assisted enucleation of large mandibular odontogenic cysts. Oral Surg Oral Med Oral Pathol Oral Radiol 2020;129:115-9.

Përktheu: Valbona Spahia