Përse duhen mbajtur dhëmballët e pjekurisë

Nga Lara Figini

Molarët e tretë ose dhëmballët e pjekurisë, zakonisht eruptojnë nga mosha 17 deri në 26 vjeç dhe duke qenë se janë dhëmbët e fundit që shfaqen në harkadë në shumicën e rasteve nuk gjejnë hapësirën e nevojshme për pozicionim të saktë.
Reduktimi i hapësirës në dispozicion të molarëve të tretë lidhet shpesh me perikoronitin, kariesin dentar, dëmtimin e strukturave pranë, cistet.

Përgjithësisht ekstraktimi i molarëve të tretë është indikuar kur janë të pranishme shenja apo simptoma të patologjisë, por cilat janë motivet që tregojnë se është mirë që të mbahen në harkadë?

Tipologjia e kërkimit dhe modaliteti i analizës
Në një studim, të publikuar në International Journal of Oral and Maxillofacial Surgery në nëntor 2019, autorët kanë kuantifikuar indikacionet përse duhen mbajtur molarët e tretë në harkadë.

Ky studim retrospektiv kohoorti ka përfshirë 1682 pacientë (818 meshkuj, 864 femra; me moshë mesatare 31 vjeç) që janë adresuar në klinikat universitare të Lovanio (Belgjikë) për heqjen e molarit të tretë.

Tetë arsye janë identifikuar nga autorët për të mbajtur në harkadë molarët e tretë:
• risku kirurgjikal për dëmtimin e strukturave pranë;
• gjendja shëndetësore e pacientit të prekur;
• hapësira e përshtatshme për eruptim;
• molari i tretë shërben si dhëmb shtyllë për urat ose kurorat;
• arsye ortodontike;
• eruptimi i molarit të tretë në okluzionin e duhur;
• molari i tretë asimptomatik te pacientët me moshë >30 vjeç;
• vendim i pacientit.

Një total prej 1149 molarësh të tretë janë hequr nga 548 pacientë. Arsyet më të shpeshta në bazë të vendimit për ta mbajtur atë në harkadë kanë qenë: eruptimi i saktë i tij (31,9%), vendim i pacientit (31,5%) dhe molar i tretë asimptomatik te pacientët me moshë >30 vjeç (17,5%).

Shumë shpesh gjendja shëndetësore e dëmtuar dhe mosha e madhe e pacientit kanë ndikuar në vendimin për të mbajtur molarët e tretë. Një e treta e pacientëve të analizuar kishte arsye të mira për të mbajtur në harkadë një ose më shumë molarë.

Konkluzione
Nga të dhënat e nxjerra nga ky studim retrospektiv kohoorti, që duhet të konfirmohen me punime të tjera analoge, mund të dalim në përfundimin që shkaku kryesor më i shpeshtë që stomatologët vendosin që të mbajnë molarët e tretë në harkadë është eruptimi i tyre i saktë, i ndjekur nga refuzimi i pacientit për ekstraktimin e tyre.

Implikime klinike
Për shkak të natyrës retrospektive të këtij studimi, këto rezultate duhet të merren në konsideratë me kujdes.
Vijimi në këtë linjë kërkimi mund të jetë i rëndësishëm në limitimin e komplikacioneve post-ekstraktive dhe në përmirësimin e suksesit.

Për më tepër: De Bruyn L, Vranckx M, Jacobs R, Politis C. A retrospective cohort study on reasons to retain third molars. Int J Oral Maxillofac Surg 2019 Nov 5. pii: S0901-5027(19)31350-5.

Përktheu: Valbona Spahia